कोशी प्रदेशसभाबाट बजेट अध्यादेश स्वीकृत

अभियान संवाददाता

काठमाडौं,। कोशी प्रदेशसभाको बैठकले ‘प्रदेश सरकारको अर्थसम्बन्धी प्रस्तावलाई कार्यान्वयन गर्न बनेको अध्यादेश’ र ‘आर्थिक वर्ष २०८०/८१ को सेवा र कार्यका लागि प्रदेश सञ्चित कोषबाट केही रकम विनियोजन तथा खर्च गर्ने सम्बन्धमा व्यवस्था गर्न बनेको अध्यादेश’ पारित गरेको छ ।

प्रदेशसभाले २०८० मङ्सिर १६ गतेभित्र अध्यादेश पारित नगरे अघिल्लो पटकझैं कोशी प्रदेशमा बजेट होलिडे हुने अवस्था थियो ।

सोमवार बसेको प्रदेशसभाको बैठकले ‘प्रदेश सरकारको अर्थसम्बन्धी प्रस्तावलाई कार्यान्वयन गर्न बनेको अध्यादेश’ र ‘आर्थिक वर्ष २०८०/८१ को सेवा र कार्यका लागि प्रदेश सञ्चित कोषबाट केही रकम विनियोजन तथा खर्च गर्ने सम्बन्धमा व्यवस्था गर्न बनेको अध्यादेश’ सर्वसम्मत स्वीकृत गरेको हो ।

दुवै अध्यादेश अस्वीकृत गर्न प्रदेशसभाका सदस्यहरू भूपेन्द्र राई, नारायणबहादुर मगर र खिनु लङ्वा लिम्बूले प्रदेशसभामा पेश गरेको सूचना फिर्ता लिएपछि सरकारको तर्फबाट विनाविभागीय मन्त्री गणेशप्रसाद उप्रेतीले अध्यादेश स्वीकृतिका लागि निर्णयार्थ पेश गरेका थिए । प्रदेशसभा सदस्य बुर्जा मगरले अध्यादेश अस्वीकृतको सूचना दर्ता गरे पनि फिर्ता लिनुपरेको बताए । मन्त्री उप्रेतीले कोशी प्रदेशमा पहिलोपटक बजेट होलिडेको अवस्था समेत बेहोरिसकेको र पुन: दोस्रोपटक पनि त्यस्तो अवस्था आउन नदिन सरकारको तर्फबाट दुवै अध्यादेश स्वीकृतिका लागि पेश गरिएको बताए ।

‘हाल दोस्रोपटक अध्यादेशबाट बजेट आएको छ, यसलाई २०८० मङ्सिर १६ गतेभित्र पारित र प्रमाणीकरण नगरे पुन: बजेट होलिडेको अवस्था आउनेछ,’ मन्त्री उप्रेतीले भने, ‘अहिले अध्यादेश पारित भएसँगै प्रदेश सरकारले प्रतिस्थापन विधेयक सभामा पेश गर्नेछ, जुन समयसीमाभित्रै प्रमाणीकरण हुने अपेक्षा छ ।’

प्रतिक्रिया [0]