पर्यटकको आगमनसँगै भरतपुर विमानस्थलमा यात्रुको अत्यधिक चाप 

अभियान संवाददाता

चितवन । चितवनमा पर्यटकको आगमन बृद्धि सँगै अहिले भरतपुर विमानस्थलमा यात्रुहरुको चाप अत्यधिक बढेको छ । चाडबाडसँगै पर्यटकीय सिजन शुरु भएकोले यात्रुहरुको चाप बढेको हो । यसअघि भरतपुर विमानस्थलबाट १० ओटा काठमाडौं र एउटा पोखराको लागि उडान हुँदै आएपनि अहिले बुद्ध एयरले काठमाडौ जाने एउटा जहाज घटाएको  छ ।

यसअघिका बर्षहरुमा  सबैभन्दा बढी चाप दशैंमा हुने भएतापनि यो बर्ष तिहारको समयमा भएको बढी चाप भएको बुद्ध एयरका प्रबन्धक भक्त बहादुर बस्नेत बताउँछन । ‘अरुबेला पनि सिटहरु प्याकनै हुन्थे उनले भने, अहिले त दशैंमा भन्दा बढी तिहारमा चाप बढेको देखियो ।’

आउने जाने दुबै तर्फको टिकट करीब एक हप्ताको लागि बुकिङ्ग  भएको उनले जानकारी दिए ।  ‘अहिले जाडो याममा चाडैं राती हुने भएकोले एउटा फ्लाईट पनि घटेको छ । अर्कोकुरा पर्यटक र बैदेशिक रोजगारीमा जानेले उत्तिकै टिकट काटेका छन ।’ बस्नेतले भने । चाडबाड मनाएर काठमाडौं फर्किने र बिदेशका लागि काठमाडौं जाने यात्रुका कारण पनि चाप बढेको बस्नेतको भनाई छ । 

भरतपुर विमानस्थल अघि रहेको  भिजीट अगेन ट्राभल एजेन्सीका सञ्चालक कपिल घिमिरे अबको ४ दिनसम्म भरतपुर –काठमाडौं टिकट प्याक भएको बताउँछन । ‘उताबाट आउने भन्दा काठमाडौं जाने र फर्केनको बढी चाप छ , उनले भने, आउने टिकट त फाट्ट फुट्ट पाईन्छ ।’ दशैंमा भन्दा पनि बढी तिहारको समयमा यात्रुको चाप बढी भएको उनको भनाई छ । 

काठमाडौंबाट भरतपुर तिहार मनाउन आएकी विद्या शर्मा आचार्य आउँदा टिकट मुश्किलले पाएपनि जाँदा भने नपाएको बताउँछिन । ‘आउँदा २, ३ दिन अघिनै बुकिङ्ग गरेर बल्ल बल्ल आएको हो  , उनले भनिन, जाँदा त केही गरेपनि पाउन सकिन ।’ टिकट पाउन नसकेपछि गाडीबाट जाने तयारी गरेको उनले बताईन ।  

बिमानस्थलका प्रमुख दिपक बिक चितवनमा यो समय सधैजसो यात्रुको चाप बढ्ने बताउँछन ।  ‘प्राय यो चाप बढ्ने बेलानै हो, तर अहिले नपत्याउांदोगरी भीड छ ।’ उनले भने । यो समय आन्तरिक तथा बाह्य पर्यटकको लागि मौसम राम्रो र घुम्न रमाईलो हुने गरेका कारण चाप बढेको उनले बताए । 

हाल भरतपुरबाट ९ ओटा  बुद्ध एयरका ४७ सिटे जहाज काठमाडौंका लागि उडान भर्ने गर्दछन भने एउटा जहाज पोखराको लागि उड्ने गर्दछ । 

प्रतिक्रिया [0]