काठमाडौं । शुक्रवार तीन कम्पनीले संस्थापक शेयर विक्रीमा ल्याएका छन् । एनएमबि बैंकले १ लाख २३ हजार ३२४ कित्ता, सानिमा जिआईसी इन्स्योरेन्सले १ लाख २३ हजार ८९३ कित्ता र नेपाल इन्स्योरेन्सले ६६ हजार ५६६ कित्ता संस्थापक शेयर विद्यमान संस्थापक शेयरधनीहरूले मात्र खरीद गर्न पाउने गरी विक्रीमा ल्याएका हुन् ।
यी शेयर खरीद गर्न इच्छुक विद्यमान संस्थापक शेयरधनीहरूले आगामी ३५ दिनभित्र आवेदन पेस गर्नुपर्नेछ । तीन कम्पनीहरूमध्ये नेपाल इन्स्योरेन्स शेयरको मूल्य प्रतिकित्ता ३०० रुपैयाँ तोकेको छ । इच्छुक खरीदकर्ताहरूले सम्बन्धित कम्पनीहरूको काठमाडौंस्थित कार्यालयमा आवेदन पेस गर्नुपर्नेछ ।
एनएमबि बैंकको शेयर खरीदका लागि केन्द्रीय कार्यालय बबरमहलमा, सानिमा जिआईसी इन्स्योरेन्सको रजिष्टर्ड कार्यालय टंगालमा र नेपाल इन्स्योरेन्सको कार्यालय कमलादीमा आवेदन पेस गर्नुपर्नेछ । तोकिएको अवधिभित्र विद्यमान संस्थापक शेयरधनीहरूबाट आवेदन प्राप्त नभएमा अन्य व्यक्ति तथा संस्थाहरूमा यी शेयर विक्री गरिने जानकारी कम्पनीहरूले दिएका छन् ।