काठमाडौं । नेपालको धितोपत्र दोस्रो बजारको कुल बजार पूँजीकरण ४१ खर्ब रुपैयाँ नजिक पुगेको छ । पछिल्लो कारोबार दिन बजार बन्द हुँदा कुल बजार पूँजीकरण ४० खर्ब ७४ अर्ब ८८ करोड ६६ लाख रुपैयाँ कायम भएको हो । धितोपत्र दोस्रो बजारको इतिहासमा कुल बजार पूँजीकरण ४४ खर्ब रुपैयाँभन्दा बढी रहेको तथ्याङ्क छ । २०७८ सालमा बजारले ३ हजार २०० विन्दुको उचाइ कायम गरेको समयमा धितोपत्र दोस्रो बजारको कुल बजार पूँजीकरण ४४ खर्ब रुपैयाँभन्दा बढी रहेको थियो ।
हाल बजार २ हजार ६०० विन्दु नजिक हुँदा कुल बजार पूँजीकरण ४१ खर्ब रुपैयाँ नजिक पुगेको हो । यो साता कुल बजार पूँजीकरण २ खर्ब २८ अर्ब १८ करोड ८९ लाख रुपैयाँले बढेको हो । गत साताको अन्तिम कारोबार दिन ३८ खर्ब ४६ अर्ब ६९ करोड ७६ लाख रुपैयाँ रहेको कुल बजार पूँजीकरण यो साताको अन्तिम कारोबार दिन ४० खर्ब ७४ अर्ब ८८ करोड ६६ लाख रुपैयाँ कायम भएको हो ।
गत साताभन्दा यो साता समग्र धितोपत्र कारोबार मापक नेप्से परिसूचक ५ दशमलव ९३ प्रतिशत बढेको छ । गत साताको अन्तिम कारोबार दिन २ हजार ४२४ दशमलव ३२ विन्दुमा रहेको नेप्से परिसूचक यो साताको अन्तिम कारोबार दिन २ हजार ५६८ दशमलव १३ विन्दुमा बन्द भएको हो । नेप्से परिसूचकसँगै ठूला कम्पनीहरूको मात्र कारोबार मापक सेन्सेटिभ इन्डेक्स पनि यो साता ५ दशमलव ४८ प्रतिशत बढेको छ । सेन्सेटिभ इन्डेक्स ४६० दशमलव शून्य ५ विन्दुमा रहेको हो ।
लगानीकर्ताको उत्साह कायम रहेको अवस्थामा यो साता २० अर्ब ५१ करोड रुपैयाँभन्दा बढी धितोपत्र कारोबार भएको छ । गत साता ५३ अर्ब ९ करोड ८६ लाख रुपैयाँभन्दा बढीको १४ करोड ४९ लाखभन्दा बढी कित्ता धितोपत्र कारोबार भएकोमा यो साता ७३ अर्ब ६१ करोड ६६ लाख रुपैयाँभन्दा बढीको १९ करोड ७० लाख ८३ हजारभन्दा बढी कित्ता धितोपत्र कारोबार भएको हो ।
यो साता औसत कारोबार रकम गत साताभन्दा ४ अर्ब १० करोड रुपैयाँभन्दा बढी र औसत कारोबार कित्ता १ करोड ४ लाखभन्दा बढी भएको नेप्सेको तथ्याङ्क छ । गत साता औसतमा १० अर्ब ६१ करोड रुपैयाँभन्दा बढीको २ करोड ८९ लाख ९९ हजारभन्दा बढी कित्ता धितोपत्र कारोबार भएकोमा यो साता १४ अर्ब ७२ करोड ३३ लाख रुपैयाँभन्दा बढीको ३ करोड ९४ लाख १६ हजारभन्दा बढी कित्ता धितोपत्र औसतमा कारोबार भएको हो ।
सातागत परिसूचकको तुलना
विवरण | गत साता | अघिल्लो साता | फरक | फरक प्रतिशत |
नेप्से परिसूचक (अंक) | 2,568.13 | 2,424.32 | 143.81 | 5.93 |
सेन्सेटिभ इन्डेक्स (अंक) | 460.05 | 436.14 | 23.91 | 5.48 |
कारोबार रकम (रू. हजारमा) | 73,616,614.09 | 53,098,631.05 | 20,517,983.04 | 38.64 |
कारोबार कित्ता | 197,083,228.00 | 144,996,865.00 | 52,086,363.00 | 35.92 |
औसत कारोबार रकम (रू. हजारमा) | 14,723,322.82 | 10,619,726.21 | 4,103,596.61 | 38.64 |
औसत कारोबार कित्ता | 39,416,645.60 | 28,999,373.00 | 10,417,272.60 | 35.92 |
कुल बजार पूँजीकरण (रू. दश लाखमा) | 4,074,886.60 | 3,846,697.61 | 228,188.99 | 5.93 |
स्रोत : नेपाल स्टक एक्सचेञ्ज (नेप्से) ।
पछिल्लो समय २ हजार ३० विन्दुदेखि उकालो लागेको बजार ५३८ अंकले बढिसकेको छ । बढेको बजारलाई थप अघि बढाउन सहयोग हुने गरी शुक्रवार नेपाल राष्ट्र बैंकले चालू आर्थिक वर्षको लागि मौद्रिक नीति सार्वजनिक गरेको छ । यस वर्षको मौद्रिक नीतिले २०७८/७९ देखि प्रभाव पार्दै आएको शेयर धितोकर्जाको सीमा संस्थागत लगानीकर्ताको लागि हटाएको छ । यो सीमा संस्थागत लगानीकर्तामा २० करोड रुपैयाँसम्म थियो । यो व्यवस्थाले आगामी दिनमा दीर्घकालीन लगानीकर्ताको रूपमा काम गर्ने विश्वास लिएका संस्थागत लगानीकर्ताहरूले बजारमा लगानी बढाउने र बजारले थप गति लिने विश्वास गरिएको छ ।
व्यापारिक समूहको परिसूचक सर्वाधिक ११.६७ प्रतिशत बढ्यो
यो साता करिब ६ प्रतिशत बढेको बजारमा सबै समूहगत परिसूचक बढेका छन् । यो साता व्यापारिक समूहको परिसूचक सर्वाधिक ११ दशमलव ६७ प्रतिशत बढेको हो । गत साता बैंकिङ समूहको परिसूचक सर्वाधिक पहिलो नम्बरमा बढ्दा व्यापारिक समूहको परिसूचक सर्वाधिक दोस्रोमा बढेको थियो ।
यो साता उत्पादन तथा प्रशोधनको ८ दशमलव ७४ प्रतिशत, लघुवित्तको ७ दशमलव ९७ प्रतिशत, निर्जीवन बीमाको ७ दशमलव ९४ प्रतिशत, होटल तथा पर्यटनको ७ दशमलव ८५ प्रतिशत, वित्तको ७ दशमलव ३६ प्रतिशत, जीवन बीमाको ६ दशमलव ५८ प्रतिशत, जलविद्युत्को ५ दशमलव ४६ प्रतिशत, बैंकिङको ५ दशमलव १७ प्रतिशत, लगानीको ४ दशमलव ४९ प्रतिशत, अन्यको ४ दशमलव ३० प्रतिशत, म्युचुअल फण्डको ३ दशमलव ४१ प्रतिशत र विकास बैंकको २ दशमलव ८२ प्रतिशत परिसूचक बढेको छ ।
साताव्यापी समूहगत परिसूचकमा आएको परिवर्तन
विवरण | यो साता | गत साता | फरक प्रतिशत |
व्यापारिक | 3,776.14 | 3,381.49 | 11.67 |
उत्पादन तथा प्रशोधन | 7,795.70 | 7,169.14 | 8.74 |
लघुवित्त | 5,571.14 | 5,159.95 | 7.97 |
निर्जीवन बीमा | 12,871.17 | 11,924.37 | 7.94 |
होटल तथा पर्यटन | 6,628.01 | 6,145.51 | 7.85 |
वित्त | 2,966.13 | 2,762.90 | 7.36 |
जीवन बीमा | 12,229.54 | 11,475.03 | 6.58 |
जलविद्युत् | 3,148.28 | 2,985.28 | 5.46 |
बैंकिङ्ग | 1,432.58 | 1,362.16 | 5.17 |
लगानी | 92.19 | 88.23 | 4.49 |
अन्य | 1,871.50 | 1,794.28 | 4.3 |
म्युचुअल फण्ड | 21.23 | 20.53 | 3.41 |
विकास बैंक | 5,045.79 | 4,907.31 | 2.82 |
स्रोत : नेपाल स्टक एक्सचेञ्ज (नेप्से) ।