दोस्रो संस्करणको ‘शीप मेला २०८२’ जेठ पहिलो साता

काठमाडौँ । काठमाडौँ महानगरपालिकाले आगामी जेठ ७ गतेदेखि दोस्रो संस्करणको ‘शीप मेला २०८२’ आयोजना गर्ने भएको छ ।  

अघिल्लो वर्षझैँ टुँडिखेलमा सञ्चालन गर्न लागिएको उक्त मेलामा २ हजार ८२ जनालाई सहभागी गराउने लक्ष्य रहेको कामपाको प्रमुख बालेन्द्र शाह (बालेन) ले जानकारी दिए । 

शीपयुक्त जनशक्ति भएमात्र सुरक्षित रोजगारी हुने, उत्पादन वृद्धिमा योगदान हुने र यस चक्रबाट देशको आर्थिक समृद्धिमा योगदान पुग्ने प्रमुख शाहको धारणा रहेको छ । १५ हजार युवालाई शीपमूलक तालिम प्रदान गरेर कम्तीमा ५ हजार जनालाई रोजगार तथा स्वरोजगार बनाउने उद्देश्यसहित आर्थिक वर्ष ०८०/८१ देखि महानगर गौरवको योजनाअन्तर्गत ‘रोजगारी र आय वृद्धि, काठमाडौँको समृद्धि’ कार्यक्रम कामपाले कार्यान्वयनमा ल्याएको छ ।  

शीप नजानेकालाई शीप सिकाउने, शीपको आधारभूत तालिम लिएकालाई स्तरोन्नति गराएपछि बजारमा शीपयुक्त जनशक्ति उपलब्ध गराउने मेला आयोजनाको लक्ष्य रहेको पनि प्रमुख शाहले जानकारी दिए । 

मेलाको पहिलो संस्करण श्रमिक दिवस २०८१ का दिनदेखि टुँडिखेलमा शुरु भएको थियो । त्यस संस्करणमा तालिमका लागि ६८ हजार ८६६ जनाले आवेदन दिएका थिए । मेलाबाट विभिन्न विधामा घ हजार ८१ जना युवालाई शीपमूलक तालिम प्रदान गर्ने लक्ष्य राखिएको थियो । 

रोजगार र स्वरोजगारमा आबद्ध नभएका र कामपाको सम्पर्कमा रहेका जनशक्तिलाई उद्योग तथा कम्पनीसँग सहकार्य गरेर कामपाले अन द जब ट्रेनिङ गराइरहेको छ । आन्तरिक रुपमै रोजगारीका थुप्रै सम्भावना छन् भन्ने देखाउनु, शीप नभएर अनौपचारिक क्षेत्रको अर्थतन्त्रमा बसिरहेका जनशक्तिलाई रोजगारी र उद्यमका अवसरबाट औपचारिक अर्थतन्त्रमा रुपान्तरण गराउनु मेलाको लक्ष्य रहेको कामपाको भनाइ रहेको छ ।   

‘शिक्षालाई शीपसँग’, ‘शीपलाई श्रमसँग’ ‘श्रमलाई उत्पादनसँग’ जोडेर शीप नहुनेलाई शीपयुक्त बनाउनु, शीप भएकालाई रोजगार तथा स्वरोजगार बनाउनु, रोजगारमा भएका तर शीप नभएकाहरुको व्यावसायिकस्तर वृद्धि गराएर आयमा वृद्धि गराउनु तालिम सञ्चालनको मुख्य लक्ष्य हो ।  

गएको वर्ष तालिम लिन नपाएका कामपामा स्थायी वा अस्थायी रुपमा बसोबास गरिरहेका, स्यानिटरी ल्याण्डफिल साइट प्रभावित क्षेत्रका बासिन्दा, फरक क्षमता भएका व्यक्ति, विगतमा सडक व्यापार, ठेलामा व्यापार गरेका व्यक्तिहरुलाई तालिमका लागि प्राथमिकतामा राखिएको छ । 

यस वर्ष १० वटा विधाका ३० वटा पेशासँग सम्बन्धित विषयमा तालिम सञ्चालन हुने बताइएको छ । रासस