काठमाडौं। एनआईसी एशिया बैंकले आफ्नो मधेश प्रादेशिक कार्यालय र वीरगञ्ज शाखा कार्यालय पर्सास्थित वीरगञ्ज महानगरपालिका–१० आदर्शनगरमा नवनिर्मित आफ्नै भवनबाट सेवा सञ्चालनमा ल्याएको छ । बैंकले निर्माण गरेको उक्त नवनिर्मित भवनबाट प्रादेशिक कार्यालय र शाखा सञ्चालनमा ल्याएपश्चात् ग्राहकलाई सम्पूर्ण किसिमका बैंकिङ सेवा लिन थप सहज हुने बैंकको विश्वास छ । साथै, उक्त नवनिर्मित भवनमा ग्राहकलाई डिजिटल बैंकिङतर्फ प्रोत्साहन गर्ने उद्देश्यका साथ बैंकले क्यास डिपोजिट मेसिन, किओस्क मेसिन, क्यास रिसाइकलर मेसिन जस्ता अत्याधुनिक सुविधासम्पन्न मेसिनबाट डिजिटल बैंकिङ कारोबार गर्नका लागि बेग्लै डिजिटल बैंकिङ हलसमेत सञ्चालनमा ल्याएको छ ।
बैंकले ३६० शाखा, ६७० एटीएम, ११८ विस्तारित काउन्टर एवं ५१ शाखारहित शाखा विस्तार गरेको छ । देशको अर्थतन्त्रको सबलीकरण तथा उच्च आर्थिक वृद्धिमा टेवा पुर्याउन उत्तरदायी बैंकिङको अभ्यास गर्दै स्थापनाकालदेखि हालसम्ममा कुल रू. २३ अर्ब ७ करोडभन्दा बढी राजस्व नेपाल सरकारलाई भुक्तानी गरेको दाबी गरेको छ । गत आर्थिक वर्षमा रू. ३ अर्ब ६१ करोडभन्दा बढी राजस्व नेपाल सरकारलाई बुझाएको बैंकको भनाइ छ ।