काठमाडौं। शैक्षिक संस्था प्रोफेसनल एजुकेटर्स लिमिटेड (ग्लोबल ग्रुप) र बीमा कम्पनी नेपाल लाइफ इन्स्योरेन्स कम्पनी लिमिटेडबीच इक्विटी लगानी सम्झौता सम्पन्न भएको छ । सम्झौता अनुसार नेपाल लाइफले १ अर्ब ३४ करोड रुपैयाँ लगानी गर्ने बताइएको छ ।
नेपाल लाइफ इन्स्योरेन्सका अध्यक्ष गोविन्दलाल संघई, नेपाल चेम्बर अफ कमर्सका अध्यक्ष कमलेश अग्रवाल लगायतको उपस्थितिमा प्रोफेसनल एजुकेटर्सका अध्यक्ष डा. खगेन्द्रप्रसाद ओझा र नेपाल लाइफ इन्स्योरेन्सका प्रमुख कार्यकारी अधिकृत प्रवीणरमण पराजुलीले सम्झौतामा हस्ताक्षर गरेका हुन् ।
लगानीका क्षेत्रमा भएको यो सम्झौताले मुलुकको शैक्षिक इतिहासमा नयाँ आयामको थालनी भएको बताइएको छ । शैक्षिक प्रवर्द्धनमुखी कदम र नयाँ प्रयोगका माध्यमबाट शिक्षा क्षेत्रको दिगो संस्थागत संरचना खडा गर्न सम्झौताले सहयोग गर्ने अपेक्षा गरिएको छ । यस किसिमको पहलबाट कम्पनीको गरिमा स्वत: अभिवृद्धि हुन जाने भएकाले नेपालको शिक्षा क्षेत्रमा यस लगानी सम्झौताको सन्दर्भलाई शैक्षिक विकासको कोसेढुंगो मान्न सकिने बताइएको छ ।