काठमाडौं । ज्योति विकास बैंकले १६औं वार्षिकोत्सवको अवसरमा संस्थागत सामाजिक उत्तरदायित्वको निम्ति स्थापित ‘हाम्रो विकास प्रवद्र्धन कोष’मार्फत ३ ओटा सम्झौता गरेको छ ।
बैंकले स्वास्थ्य, शिक्षा, र सशक्तीकरणका क्षेत्रहरूमा दीर्घकालीन प्रभाव र सकारात्मक परिवर्तन ल्याउन, समाजको समग्र विकास गर्न र समुदायलाई समृद्ध र आत्मनिर्भर बनाउन सो सम्झौता गरेको हो ।
बैंकले शारीरिक तवरले फरक बालबालिकाहरूलाई कृत्रिम हात प्रदान गर्न ई–नेबल नेपालसँग सहकार्यको सम्झौता गरेको छ । सम्झौतापत्रमा बैंकका तर्फबाट प्रमुख कार्यकारी अधिकृत कपिल ढकाल तथा ई–नेबल नेपालका अध्यक्ष सुरेन्द्र श्रेष्ठले हस्ताक्षर गरे ।
यस सहकार्यबाट बैंकले १६ जना बालबालिकाहरूलाई थ्रिडी प्रिन्टेड कृत्रिम हात प्रदान गर्नेछ। प्रदान गरिने कृत्रिम हातहरूले बालबालिकाहरुलाई सामान्य दिनचर्यामा सहयोग पुर्याउनुका साथै
बालबालिकाको मनोबल र आत्मविश्वासलाई पनि उच्च राख्न सहयोग गर्ने विश्वास बैंकले राखेको छ। बैंकले यसअघि पनि ई–नेबल नेपालसँगको सहकार्यमा १५ जना बालबालिकाहरूलाई उक्त हातहरु प्रदान गरेको थियो।
त्यस्तै, बैंकले राष्ट्रिय आविष्कार केन्द्रसँग सहकार्यमा ‘न्यानो नानी’ परियोजना–५ लाई निरन्तरता दिने घोषणा गरेको छ। ‘न्यानो नानी’ बेबी वार्मर मेसिन आवश्यकता भएका विभिन्न स्वास्थ्य चौकी तथा बर्थिङ सेन्टरमा जडान गर्न बैंक र राष्ट्रिय आविष्कार केन्द्रबीच सम्झौता भएको हो । बैंकका प्रमुख कार्यकारी अधिकृत कपिल ढकाल र राष्ट्रिय आविष्कार केन्द्रका महाप्रबन्धक संजय झाले उक्त सम्झौतापत्रमा हस्ताक्षर गरेका छन् ।
बैंकले राष्ट्रिय आविष्कार केन्द्रसँग सहकार्यमा हालसम्म विभिन्न चरणहरूमार्फत देशका विभिन्न अस्पताल, स्वास्थ्य चौकी तथा बर्थिङ सेन्टरहरूमा ४५ वटा बेवी वार्मर जडान गरिसकेको छ। साथै, बैंकले अस्पतालका डाक्टर, नर्स लगायत सम्बन्धित कर्मचारीहरूलाई विज्ञ मार्फत बेबी वार्मर सञ्चालनसम्बन्धी विशेष तालिम पनि दिनुका साथै त्यसको उच्चतम सदुपयोग सुनिश्चित गर्न विशेष तालिमको लागि पनि समन्वय गर्दै आएको छ ।
त्यसैगरी, बैंकले स्वावलम्बन नेपाल संस्थासँग डेस्क बेञ्च प्रदान गर्ने सम्झौता गरेको छ । अभिभावकविहीन बालबालिकाहरूको आंशिक भएपनि अभिभावकत्व निर्वाह गर्ने, सिकाइ वातावरण अभिवृद्धि गर्ने र समग्र शैक्षिक अनुभवमा गुणात्मक सुधार ल्याउने उद्देश्यका साथ उक्त सम्झौता गरिएको बैंकले जानकारी दिएको छ ।
बैंकले उपत्यका र उपत्यकाबाहिर गरी हाल १२१ शाखा कार्यालय, ३ विस्तारित काउन्टर तथा ७५ वटा एटीएममार्फत बैंकिङ सेवा उपलब्ध गराउँदै आइरहेको छ ।