काठमाडौं । ज्योति विकास बैंक लिमिटेडले ‘ज्योतिज गट ट्यालेन्ट’को पहिलो संस्करण आयोजना गरेको छ । बैंकले आफ्नो १६औं वार्षिकोत्सवको अवसरमा देशभरका कार्यालयका कर्मचारी र तिनका परिवारका बालबालिकाको सहभागितामा उक्त कार्यक्रम गरेको हो ।
प्रतियोगिताअन्तर्गत कर्मचारीका लागि नृत्य, संगीत, हास्यव्यंग्य, चित्रकला र कविता गरी ५ ओटा विधामा र कर्मचारीका परिवारका बालबालिकाको लागि नृत्य, संगीत, हास्यव्यंग्य, चित्रकला, जादू, हस्तलेखन र कविता गरी ७ ओटा विधामा प्रतिष्पर्धा गराइएको थियो ।
प्रतियोगिताका विजेताको घोषणा गत बुधवार गरिएको थियो । विजेताहरूलाई बैंकका अध्यक्ष हरि चन्द्र खड्का र प्रमुख कार्यकारी अधिकृत कपिल ढकालले बधाई दिएका थिए ।
कर्मचारी र तिनका परिवारका बालबालिकाको प्रतिभा उजागरका लागि प्रतियोगिता आयोजना गरिएको बैंकको भनाइ छ । प्रतियोगिताबाट सहभागीहरूको शीप प्रवर्द्धन र आत्मविश्वास अभिवृद्धि गरेको बैंकको भनाइ छ ।
ज्योति विकास बैंकले उपत्यका र उपत्यकाबाहिर गरी हाल १२१ शाखा कार्यालय, ३ विस्तारित काउन्टर तथा ७५ वटा एटीएममार्फत बैंकिङ सेवा उपलब्ध गराउँदै आइरहेको छ ।