सरकारले अत्यावश्यक खाद्यवस्तुको अधिकतम खुद्रा मूल्य (एमआरपी) तोक्ने भएको छ । आम उपभोक्तालाई अस्वाभाविक मूल्य वृद्धिको भार नपरोस् भनेर त्यस्तो मूल्य तोक्न लागिएको वाणिज्य तथा आपूर्ति व्यवस्थापन विभागका निर्देशक प्रेमप्रसाद पौडेलले बताए ।
सरकारले चामल, दाल, पीठो, तेल, गेडागुडी, नून, चिनी र चिउरा गरी आठ वस्तुको अधिकतम खुद्रा मूल्य पहिलोपटक तोक्न लागेको हो । यससम्बन्धी औपचारिक प्रस्ताव विभागले सम्बद्ध मन्त्रालयसमक्ष पेश गरिसकेको छ । यसअघि यस्ता वस्तुको मूल्य व्यापारीहरू आफैले तोक्दै आएका थिए ।
‘चाडपर्व नजिकिँदै गर्दा अस्वाभाविक रूपमा बजार मूल्य बढेकाले सरकार जतिसक्दो चाँडो यस्तो मूल्य निर्धारण गर्न सक्रिय छ,’ उनले भने, ‘त्यसका लागि सरकारले आन्तरिक गृहकार्य गरिरहेको छ ।’ अत्यावश्यक वस्तु नियन्त्रण ऐन २०१७ बमोजिम यस्तो मूल्य निर्धारण गर्न लागिएको पनि पौडेलले बताए ।
वर्ष ८, अंक ४, शुक्रवार २२ भदौ, २०६९