काठमाडौं । नेपाल इन्टरनेसनल टुरिजम एक्स्पो (नाइट)को तयारी पूरा भएको आयोजकले जनाएको छ ।
आयोजक समिट इभेन्ट्स एन्ड मार्केट्सले बिहीवार (आज) प्रेस विज्ञप्ति जारी गर्दै यसबारे जानकारी दिएको हो । एक्स्पो शुक्रवारदेखि दुई दिनसम्म काठमाडौंको भृकुटीमण्डपमा चल्नेछ ।
नेपालको पर्यटनलाई अन्तरराष्ट्रिय बजारमा प्रवद्र्धन गर्न उद्देश्यले एक्स्पो आयोजना गर्न लागिएको आयोजकले जारी गरेको प्रेस विज्ञप्तिमा उल्लेख छ ।
नाइट एक्स्पोले देश तथा विदेशमा रहेका पर्यटन सम्बद्ध व्यवसायी (होटेल, रिसोर्ट, होमस्टे, ट्राभल/टुर/ट्रेकिङ/माउन्टेनियरिङ एजेन्सी, एयरलाइन्स), सरोकारवाला व्यक्ति तथा निकायलाई एक ठाउँमा ल्याई नेपालको समग्र पर्यटन प्रवर्द्धन गर्ने लक्ष्य लिएको छ । प्रदर्शनीमा १६ देश, १५० विक्रेता, २५० क्रेता तथा १ हजारभन्दा बढी आगन्तुकको सहभागिता रहने आयोजकले जनाएको छ ।
उक्त एक्स्पोले राष्ट्रिय र अन्तरराष्ट्रिय पर्यटन सरोकारवालालाई दुई दिने नेटवर्किङका लागि एकसाथ ल्याउने, नयाँ सहकार्यलाई बढावा दिने र दिगो साझेदारी स्थापना गर्ने लक्ष्य राखेको छ । एस्क्पोमा पर्यटनसँग सम्बन्धित विभिन्न विषयमा समूह छलफल (प्यानल डिस्कसन) हुनेछ ।