नेपाल प्रख्यात कार्टून शृंखला ‘द फ्लिण्टस्टोन्स’का पात्रहरूले पेडलविनाको साइकल दौडाएको त सबैले देखेकै हो । तर, दुई जना जर्मन इञ्जिनीयरले द फ्लिण्टस्टोन्सकै चरित्रले प्रयोग गर्ने यातायातबाट सृजनात्मक प्रेरणा लिएर निर्माण गरेको त्यस्तै एक साइकलले मानिशहरूको ध्यान आकृष्ट गरिरहेको छ ।
फिल्ज बाइक नाम दिइएको यो साइकलका चालकले हिँडेर अथवा दौडेर आफ्नो गति कायम राख्ने गर्दछन् । अहिले बजारमा उपलब्ध साइकलहरूभन्दा नितान्त फरक ढाँचाको फिल्ज बाइकमा चालकको ढाडपट्टिको भाग साइकलको मुन्तिर हार्नेस बेल्टले बाँधिएको हुन्छ । चालकले हिँडेर वा दौडेर साइकल चल्न सक्ने पर्याप्त गति बनाइसकेपछि फिल्ज बाइक गुड्ने गर्दछ । त्यसपछि उनले आफ्ना दुवै खुट्टालाई पछिल्तिरको पाङ्ग्रामा राखिएको फूटरेष्टमा राख्न सक्छन् र साइकललाई आफूले चाहेको गति वा दिशामा दौडाउन सक्छन् ।
पेडलविनाको साइकलको अवधारणा नयाँ भने हैन । यसका निर्माताहरू इञ्जिनीयरद्वय टम हाम्ब्रोक र जुरी स्पेट्टरका अनुसार फिल्ज बाइकको निर्माण विश्वको पहिलो साइकल लौफ्राडको डिजाइनमा आधारित छ । पेडलविनाको लौफ्राड साइकललाई जर्मन विकासकर्ता कार्ल डारिसले सन् १८१७ मा बनाएका थिए । हाम्ब्रोक र स्पेट्टरले आफ्नो वेब साइटमा फिल्ज बाइकले चालकलाई साइक्लिङको नितान्त नयाँ अनुभूति प्रदान गर्ने लेखेका छन् । यो पूर्णरूपमा सुरक्षित छ, ‘यसको ५ बिन्दुको हार्नेस बेल्ट प्रविधिले चालकलाई निकै आरामदायी साइक्लिङको अनुभूति गराउनेछ,’ इञ्जिनीयरद्वयको दाबी छ ।
वर्ष ८, अंक ६, आइतवार २४ भदौ, २०६९