काठमाडौं। सानिमा बैंकले ‘सानिमा दीर्घायु बचत खाता’अन्तर्गत रू. १० लाखको दुर्घटना बीमा दाबी रकम हस्तान्तरण गरेको छ । बैंकका खातावाला दिनेश कार्कीको दुर्घटनामा मृत्यु भएकाले उनको परिवारका सदस्यलाई बीमा रकम हस्तान्तरण गरिएको हो । बैंकको हेटौंडा शाखाका शाखा प्रबन्धक रोशन मल्ल र बीमा प्रदायक कम्पनी सिद्धार्थ प्रिमियर इन्स्योरेन्सका मार्केटिङ अधिकृत अन्जन कर्माचार्यले संयुक्त रूपमा बीमा रकमको चेक हस्तान्तरण गरेका हुन् ।
मृतक कार्कीले बैंकको हेटांैडा शाखामा ‘सानिमा दीर्घायु बचत खाता’ खोलेका थिए । बैंकले उक्त खाताअन्तर्गत रू. १० लाखको दुर्घटना बीमा, रू. १० हजारसम्मको ओपीडी भुक्तानी शुल्क सहितको रू. ५० हजारसम्मको औषधि उपचार बीमा र रू. ५ हजारको वार्षिक स्वास्थ्य परीक्षण सुविधाका साथै अन्य थुप्रै सेवा प्रदान गर्दै आएको छ । बैंकले देशका सातै प्रदेशमा १३३ शाखा कार्यालय तथा १२४ एटीएममार्फत सेवा प्रदान गर्दै आएको छ ।