काठमाडौं । सान्जेन जलविद्युत् कम्पनीको आईपीओमा रू. ४५ करोड १८ लाख १४ हजार बराबरको आवेदन परेको छ । सीडीएस क्लियरिङका अनुसार शुक्रवार बिहान १० बजे सम्ममा २२ हजार ५१५ जना आवेदकले ४५ लाख १८ हजार १४० कित्ताका लागि आवेदन दिएका हुन् । यो मागभन्दा १ दशमलव २३ गुणा बढी आवेदन परेको हो । 

यस आईपीओमा आवेदकले आगामी आइतवार (असोज ३० गते) सम्म आवेदन दिन सक्नेछन् । कम्पनीले भदौ ५ गतेदेखि आयोजना प्रभावित स्थानीय बासिन्दाहरूलाई आईपीओ निष्कासन गरेको हो । कम्पनीले रू. १०० अंकित दरका ३६ लाख ५० हजार कित्ता शेयर निष्कासन गरेको हो । 

यसमा आयोजनाबाट अति प्रभावित क्षेत्र आमाछोदिङमो गाउँपालिका-५, चिलिमे र आयोजना निर्माण गर्ने प्रशारण लाइनबाट प्रभावित आमाछादिङमो गाउँपालिका-४, गोल्जुङका बासिन्दाले आवेदन दिन सक्नेछन् । यस्तै सामान्य प्रभावित आमाछोदिङमो गाउँपालिकाका अन्य वडाहरू १, २, ३ तथा सामान्य प्रभावित बाँकी सम्पूर्ण जिल्लाका सबै बासिन्दाहरूले पनि आवेदन दिन सक्नेछन् । स्थानीयले न्यूनतम १० कित्तादेखि अधिकतम ७०० कित्तासम्म आवेदन दिन सक्नेछन् । 

यो आईपीओमा नागरिक लगानी कोष विक्री प्रबन्धक रहेको छ । यस्तै सह-निष्कासन तथा विक्री प्रबन्धकमा सनराइज क्यापिटल र एनएमबि क्यापिटल छन् । यसमा सी-आस्बा प्राप्त बैंक तथा वित्तीय संस्थाबाट आवेदन दिन सकिनेछ ।