नेपाल सरकारले भदौ २२ गतेदेखि लागू हुने गरी नेपालमा आउन चाहने वैदेशिक लगानीको न्यूनतम सीमा निर्धारण गरेको छ । अबदेखि ५० लाख रुपैयाँभन्दा कम लगानी लिएर नेपालमा वैदेशिक लगानीकर्ता आउन पाउने छैनन् । वैदेशिक लगानीलाई व्यवस्थित र मर्यादित बनाउँदै यसका माध्यमबाट नेपाली अर्थतन्त्रलाई टेवा दिने अवस्थामा पुर्याउन सरकारले यो कदम चालेको देखिन्छ । अहिलेसम्म नेपालमा विदेशका अधिकतम व्यक्तिगत र साना लगानीकर्ता आएका देखिएका छन् । यसबाट नेपाललाई विशेष लाभ पनि भएको थिएन ।
खासगरी नक्कली व्यवसायी बनेर टुरिष्ट नेपाल आउने प्रक्रिया अधिक देखिएकाले यसलाई ढिलोचाँडो व्यवस्थित बनाउनैपर्ने थियो । यद्यपि, नेपालमा लगानीका निम्ति रू. ५० लाख पनि खासै ठूलो लगानी होइन । त्यसैले, मुलुकमा लगानीमैत्री वातावरण बनाएर यो सीमालाई अझै बढाउनेतर्फ सरकार लग्नुपर्छ ।
नेपालमा वैदेशिक लगानीका रूपमा अहिलेसम्म संस्थागतभन्दा व्यक्तिगत लगानी थपिने प्रवृत्ति देखापरेको छ । व्यक्तिगत लगानीको आयतन सानो हुन्छ । तर लगानीकर्ताले भने लगानी गरिने मुलुकले दिएको भिसा सुविधा, डलर ल्याउने/लैजाने सुविधा, करछूट सुविधा आदि सबै उपभोग गर्न पाउँछ । तर, लगानी गरिने मुलुकले भने यस्तो लगानीबाट खासै फाइदा लिन सक्दैन । सरकारले यसअघिसम्म विदेशीले २० हजार अमेरिकी डलर ल्याएर लगानी गर्न पाउने सुविधा दिएको थियो ।
(सम्पादकीयबाट)
वर्ष ८, अंक ६, आइतवार २४ भदौ, २०६९