वीरगञ्ज । औद्योगिक र व्यापारिक केन्द्रको पहिचान बनाएको वीरगञ्जमा यही चैत २२ गतेदेखि २ दिने मधेश साहित्य महोत्सव आयोजना हुने भएको छ । आयोजकले वीरगञ्जमा बुधबार पत्रकार सम्मान गरी यो जानकारी दिएको हो । 

वीरगञ्ज नेपालकै आर्थिक मेरुदण्ड र ऐतिहासिक सामाजिक आन्दोलनहरूको केन्द्रबिन्दुमा नभएर साहित्यमा पनि अग्रणी छ भन्ने सन्देश दिन साहित्य महोत्सव आयोजना गरिएको उद्यमीसमेत रहेका साहित्यकार गणेश लाठले बताए । 

नेपालको ऐतिहासिक, सांस्कृतिक र आर्थिक केन्द्र साहित्य र विचार विमर्शको प्रमुख थलो बन्दैछ । मधेश क्षेत्रको सामाजिक, सांस्कृतिक र साहित्यिक उन्नयनलाई प्रवर्द्धन गर्ने उद्देश्यले मधेश साहित्य महोत्सवको आयोजना हुन गइरहेको छ, विज्ञप्तिमा भनिएको छ । 

यो महोत्सवले मधेशमा ८ जिल्लासँगै तराई मधेशमा २२ ओटा जिल्लाहरूको कला, भाषा, संस्कृति र साहित्यलाई समेट्ने दाबी गर्दै महोत्सव यो अभियानको सुरुवातमात्र भएको आयोजकले बताएको छ । 'दीर्घकालीन रूपमा मधेशको समग्र पहिचानलाई उजागर गर्ने हाम्रो अभियान हो,' आयोजक सदस्य सलमा खातुनले भनिन् ।

'वीरगञ्ज सधैँ सामाजिक सुधार र आन्दोलनहरूको केन्द्र रहँदै आएको छ। चाहे त्यो नेपालको प्रजातान्त्रिक वा मधेश आन्दोलन होस्, नागरिक अधिकारका विषयमा उठाइएका आवाजहरू हुन् । औद्योगिक तथा व्यापारिक विकासका योजनाहरूमा वीरगञ्जको भूमिका सदैव अग्रणी रहेको छ। यही ऐतिहासिक भूमिमा अब साहित्य र संस्कृतिको प्रवर्द्धन गर्दै नवीन विचारहरूको आदान प्रदान गराउन महोत्सव महत्वपूर्ण हुनेछ,' उनले भनिन् ।

साहित्य केवल शब्दहरूको संयोजनमात्रै नभएर समाजको ऐना भएको भन्दै आयोजकले यसले परिवर्तनका लहरहरू सिर्जना गर्न सक्ने दाबी गरेको छ । 'साहित्य र संस्कृतिले समुदायहरूलाई जोड्ने पुलको काम गर्छ र मधेश साहित्य महोत्सवले यही भावना बोकेको छ। यस महोत्सवमार्फत नेपाली साहित्यको विविधता, मधेशी समाजका मुद्दाहरू, भाषिक एवं सांस्कृतिक विशेषताहरूको उजागर गर्दै समग्र रूपमा साहित्यिक पुनर्जागरण ल्याउने प्रयास हुनेछ,' विज्ञप्तिमा उल्लेख छ । 

महोत्सवको पहिलो संस्करणमा नेपालका ख्यातिप्राप्त साहित्यकार, कलाकार, पत्रकार, युवा सर्जक, एवं सामाजिक अभियन्ताहरूले आआफ्ना विचार, अनुभूति र सिर्जनाहरू प्रस्तुत गर्ने आयोजकले जानकारी दिएको छ । महोत्सवमा साहित्यसँगै आर्थिक, सामाजिक र राजनीतिक सरोकारहरूमा पनि मन्थन गरिने उल्लेख छ ।