चितवन। नेपालका लागि एथर ईलेक्ट्रिक स्कुटरको आधिकारिक विक्रेता वैद्य अर्गनाइजेशनले २०२५ मोडलका स्कुटर चितवनको लागि आधिकारिक डिलर डाइनामिक इनर्जीमार्फत चितवनमा सार्वजनिक गरेको हो । कम्पनीले एथर ४५० एक्स र ४५० एस सार्वजनिक गरेको हो ।

एथर ४५० एक्स अब बहुमोड ट्रयाक्सन कन्ट्रोलसहित उपलब्ध हुनेछ, जसले यस स्कुटरलाई अझ सुरक्षित, प्रभावकारी र सुविधाजनक बनाएको डाइनामिक इनर्जीकी निर्देशक अनुष्का कार्कीले जानकारी दिइन् । ३.७ किलोवाट आवर क्षमताको ब्याट्री भएको एथर ४५० एक्सको वास्तविक रेन्ज १३० किलोमिटर भएको कम्पनीको दाबी छ ।

त्यसैगरी २.९ किलोवाट आवर क्षमताको एथर ४५० एक्स र ४५० एसको वास्तविक रेन्ज १०५ किलोमिटर छ । यसमा गुगल म्याप्स, एलेक्सा भ्वाइस असिस्ट, ह्वाट्सएप, पिङ माई स्कुटर र लाइभ लोकेसन लगायतका सुविधा उपलब्ध रहेको बताइएको छ ।

नेपाली बजारमा २०२५ मोडलका यी स्कुटरको मूल्य विभिन्न क्षमतामा ३ लाख २४ हजार ९९९ देखि ३ लाख ९९ हजार ९९९ सम्म रहेको बताइएको छ । कम्पनीले ८ वर्ष वा ८० हजार किलोमिटरको ब्याट्री वारेन्टी र ७० प्रतिशत ब्याट्री हेल्थ ग्यारेन्टी उपलब्ध गराउने बताएको छ ।