काठमाडौं। एनसेल फाउन्डेसनले एनसेल नेपाल सुपर लिग (एनएसएल) सिजन ३ को अवसरमा सिजनभर गरिने प्रत्येक गोल बराबर २५ शैक्षिक सामग्री वितरण गर्ने प्रतिबद्धता व्यक्त गरेको छ । यो पहल विषेशगरी देशका दुर्गम क्षेत्रमा रहेका विद्यालयमा अध्ययनरत विद्यार्थीको स्रोतको अभावलाई घटाउँदै गुणस्तरीय शिक्षाका लागि योगदान पुर्याउने फाउन्डेसनले जानकारी दिएको छ ।
मंगलवारसम्म खेलिएका खेल र तीनका नतीजाअनुसार फाउन्डेसनले ११ गोल बापत २७५ शैक्षिक सामग्री वितरण गर्ने सुनिश्चित भइसकेको बताइएको छ । यसरी वितरण हुने सामग्रीमा झोला, कापी, सिसाकलम, सार्पनर, इरेजर जस्ता आवश्यक शैक्षिक सामग्री समावेश हुन्छन् । यसले स्रोतसाधन अभाव भएका समुदायका विद्यार्थीलाई उनीहरूको सिकाइ अनुभव सुधार गर्न योगदान पुर्याउने विश्वास एनसेलको छ ।
‘हाम्रा समुदायको सम्बन्ध फुटबलसँग गहिरो छ र यो पहलले फुटबलको उत्साहलाई विद्यार्थीको उज्ज्वल भविष्यको लागि अर्थपूर्ण शैक्षिक सहयोगमा रूपान्तरण गर्ने उद्देश्य राखेको छ,’ एनसेलकी एनसेल फाउन्डेसन एन्ड स्पेशल प्रोजेक्ट डाइरेक्टर विषाखा लक्ष्मी खड्काले भनिन् । यसअघि नेपाल प्रिमियर लिग (एनपीएल) का दौरान, फाउन्डेसनले प्रत्येक १ चौका बराबर ४ शैक्षिक सामग्री वितरण गर्ने सुनिश्चत गरेको थियो । त्यसअनुसार एनपीएलका ६५३ चौका बापत फाउन्डेसनले कुल २ हजार ६१२ शैक्षिक सामग्री वितरण गरिरहेको छ । हालसम्म फाउन्डेसनले ४२ सरकारी विद्यालयका विद्यार्थीलाई ५ हजारभन्दा बढी शैक्षिक सामग्री वितरण गरिसकेको बताइएको छ ।
