काठमाडौँ । नेपाली ब्रान्ड ‘द हिमालयन रिजर्भ ह्विस्कि’ले अन्तरराष्ट्रिय स्तरमा ठुलो उपलब्धि हासिल गर्दै बेल्जियमको ब्रसेल्सबाट आयोजित ‘मोन्ड सेलेक्सन गोल्ड अवार्ड २०२५’ जितेको जनाएको छ । कम्पनीले यो पुरस्कारले नेपालले विश्वस्तरीय प्रिमियम ह्विस्कि उत्पादन गर्ने क्षमता रहेको र अन्तरराष्ट्रिय बजारमा प्रतिस्पर्धा गर्न सकिने कुरा पुष्टि गरेको बताएको छ ।

मोन्ड सेलेक्सन १९६१ देखि विश्वभरका पेय पदार्थ तथा मदिराहरूको गुणस्तर मूल्याङ्कन गर्ने प्रतिष्ठित संस्था हो । कम्पनीका अनुसार उक्त अवार्ड स्वाद, सामग्री, उत्पादन प्रविधि र समग्र उत्कृष्टताको आधारमा प्रदान गर्दछ। हिमालयन रिजर्भ ह्विस्किले अनुभवी सोमेलियर (मदिरा विशेषज्ञ) र मास्टर ब्लेन्डरहरूको प्यानलबाट उच्च अंक प्राप्त गरी यो सम्मान हात पारेको हो।

यस उपलब्धि प्रति आफ्नो प्रतिक्रिया राख्दै द हिमालयन रिजर्भका निर्देशक प्रदीप शार्दाले भने, “यो पुरस्कार हाम्रो मात्र होइन, सम्पूर्ण नेपालको गर्वको विषय हो । हाम्रो उद्देश्य नेपालबाट विश्वस्तरीय ह्विस्कि निर्माण गर्ने थियो। यो अवार्डले हाम्रो प्रतिबद्धता र उत्कृष्टतालाई अन्तरराष्ट्रिय रूपमा मान्यता दिएको छ। यो सफलता हाम्रा उपभोक्ता र नेपाली उद्योगप्रति समर्पित छ।”

यस ह्विस्किले नेपाली उत्पादन कलालाई विश्वबजारमा उचाईंदै देशको प्रतिनिधित्व गर्न सफल भएको कम्पनीको भनाइ छ । हिमालयन रिजर्भ ह्विस्कि नेपालमा हिमालयको शुद्ध पानी र एज्ड स्कच मल्टबाट निर्मित प्रिमियम ह्विस्कि हो। यसले नेपाली उत्पादन कलाको उत्कृष्टता विश्वबजारमा प्रस्तुत गर्दै आइरहेको छ।

यो सूचना सामाग्री मात्र जानकारीकालागि प्रकाशित गरिएको हो । मदिराजन्य वस्तुको प्रचार होईन।