काठमाडौं। एनआईसी एशिया बैंकले कैलालीको जोशीपुर गाउँपालिका–१ स्थित मोहन्याल माध्यमिक विद्यालय वडहरियामा पुस्तकालय भवन निर्माणमा सहयोग गरेको छ । संस्थागत सामाजिक उत्तरदायित्वअन्तर्गत सातैओटा प्रदेशका विभिन्न विद्यालय छनोट गरी पुस्तकालय भवन निर्माणमा सहयोग गर्ने अभियान चलाएको बैंकले विद्यालय र गाउँपालिकासँगको सहकार्यमा उक्त पुस्तकालय भवन निर्माण गरेको हो । पुस्तकालयबाट विद्यालयमा अध्ययनरत एक हजारभन्दा बढी विद्यार्थी प्रत्यक्ष रूपमा लाभान्वित हुने बैंकको अनुमान छ ।

जोशीपुर गाउँपालिकाका अध्यक्ष चित्रबहादुर चौधरी, विद्यालयका प्रधानाध्यापक देवेन्द्रप्रसाद शाह, बैंकका प्रादेशिक प्रमुख सुवास जोशी तथा जोशीपुर शाखा प्रबन्धक उजिरसिंह भण्डारी लगायतको उपस्थितिमा भवन उद्घाटन गरिएको हो । विद्यालयमा व्यवस्थित पुस्तकालय स्थापनाबाट विद्यार्थीलाई पुस्तक पढ्न र अन्य शैक्षिक सिकाइका सामग्रीमा सहज पहुँच भई शैक्षिक प्रदर्शन एवं व्यक्तित्व विकासमा ठोस टेवा पुग्ने बैंकको विश्वास छ ।