काठमाडौं । हिमालयन लाइफ इन्स्योरेन्स लिमिटेडले आगामी फागुन ११ गते १७ औं वार्षिक साधारण सभा बोलाएको छ ।
माघ १४ गते बसेको कम्पनीको सञ्चालक समितिको बैठकले काठमाडौंको बत्तीसपुतलीस्थित अनुपम फुडल्याण्ड एण्ड बैंक्वेटमा बिहान १०ः३० बजे सभा गर्ने निर्णय गरेको हो ।
प्रस्तावित १४ प्रतिशत बोनस शेयरलाई सभाले अन्तिम स्वीकृति प्रदान गर्नेछ । कम्पनीले अघिल्लो आर्थिक वर्ष ०७९/८० को मुनाफाबाट हाल कायम चुक्तापूँजी ८ अर्ब २ करोड ३ लाख ८३ हजार रुपैयाँको आधारमा १४ प्रतिशत बोनस शेयर वितरण गर्न लागेको हो ।
साविक गुराँस लाइफ इन्स्योरेन्स र यूनियन लाइफ इन्स्योरेन्ससँग मर्जर प्रक्रियापछि बनेको यस कम्पनीलाई बोनस शेयरमा लाग्ने कर भने छूट हुने भएकाले नगद लाभांश प्रस्ताव नगरिएको हो ।
सभाले आर्थिक वर्ष ०७९/८० को वार्षिक प्रतिवेदन सहितका वित्तीय विवरणहरू पारित गर्नुका साथै गत आर्थिक वर्ष ०८०/८१ को लागि लेखापरीक्षक नियुक्ति र निजको पारिश्रमिक निर्धारणको विषय पनि टुङ्ग्याउनेछ ।
बोनस शेयर वितरणपछि कम्पनीको पूँजी वृद्धि हुने भएकाले सोहीबमोजिम प्रबन्धपत्र तथा नियमावली संशोधन प्रस्ताव पनि सभाका लागि तय गरिएको छ ।
साधारण सभा प्रयोजनका लागि कम्पनीले माघ २५ गते एक दिन बुक क्लोज गर्न लागेको छ । बुक क्लोजको आधारमा माघ २४ गतेसम्म कायम शेयरधनीहरू मात्र सभामा भाग लिन र लाभांश प्राप्त गर्न सक्नेछन् ।
