काठमाडौं । नेपालमा मासिक पर्यटक आगमन अझै पनि कोरोना महामारीअघिको अवस्थामा पुग्न सकेको छैन । गत मार्च महीनामा नेपाल भ्रमणमा १ लाख २१ हजार ६८७ जना बाह्य पर्यटक आएका छन्, जुन कोरोनाअघिको वर्ष सन् २०१९ को मार्च महीनाको तुलनामा ९५ दशमलव ५५ प्रतिशत मात्र हो ।

नेपाल पर्यटन बोर्डका अनुसार सन् २०१९ को मार्चमा नेपाल भ्रमणमा आएका पर्यटक संख्या १ लाख २७ हजार ३५१ रहेको थियो । यस वर्ष गतवर्षको तुलनामा समेत पर्यटक आगमन ५ दशमलव १ प्रतिशतले घटेको छ । २०२४ को मार्च महीनामा १ लाख २८ हजार १६७ जना बाह्य पर्यटक नेपाल घुम्न आएका थिए । कोभिडपछिका वर्षहरूमा पर्यटन पुनरुत्थान भए पनि पूर्ण रूपमा सुधार हुन नसकेको बोर्डको तथ्यांकले देखाएको छ ।

मार्चमा भारतबाट सबैभन्दा धेरै पर्यटक आएका छन्, जसको संख्या २१ हजार ४१२ रहेको छ । यस्तै चीन ११ हजार ४४३ पर्यटकसहित दोस्रो स्थानमा रहेको छ भने संयुक्त राज्य अमेरिका ११ हजार ९२ आगन्तुकसहित तेस्रो स्थानमा छ । अन्य प्रमुख देशहरूमा श्रीलंकाबाट ८ हजार ८८६, बेलायतबाट ५ हजार ९९५, थाइल्याण्डबाट ४ हजार ९८६, जर्मनीबाट ४ हजार७०९, अष्ट्रेलियाबाट ४ हजार २२८, म्यान्मारबाट ३ हजार ७५४ र बंगलादेशबाट ३ हजार ५७६ पर्यटक नेपाल भ्रमणमा आएका छन् । 

सो महीना दक्षिण एसियाली (सार्क) राष्ट्रहरूबाट ३५ हजार २८७ (२९ प्रतिशत) पर्यटक आएका छन्, जसमा भारत र श्रीलंका प्रमुख रहेका छन् । अन्य एसियाली मुलुकहरूबाट ३१ हजार ३५३ (२५ दशमलव ८ प्रतिशत) पर्यटक भित्रिएका छन् । यस्तै युरोपबाट २५ हजार ७४२ (२१.२ प्रतिशत) आगन्तुक नेपाल आएका छन् भने अमेरिकी मुलुकहरूबाट १३ हजार ९०७ (११.४ प्रतिशत) पर्यटक नेपाल भ्रमणमा आएका छन् ।

बोर्डका अनुसार गत महीना ओसियाना क्षेत्रबाट ४ हजार ६४३ (३ दशमलव ८) पर्यटक नेपाल आउँदा मध्यपूर्वबाट २ हजार ७३२ (२.२ प्रतिशत) र अफ्रिकाबाट ३६८ (शून्य दशमलव २ प्रतिशत) पर्यटक नेपाल आएका छन् । अन्य विभिन्न देशहरूबाट ४ हजार ८९५ (५.१ प्रतिशत) पर्यटक नेपाल भित्रिएका छन् ।

मार्चमा चीनबाट आउने पर्यटकको संख्या ५ दशमलव ४ प्रतिशतले घटेको छ । यस्तै दक्षिण एसियाली पर्यटक आगमनमा १३ दशमलव ४ प्रतिशतको ह्रास आएको छ । युरोपबाट आउने पर्यटक संख्यामा समेत १० दशमलव ५ प्रतिशतको कमी देखिएको छ ।