काठमाडौं । नेपाल माइक्रो इन्स्योरेन्स कम्पनी लिमिटेडको शेयर नेपाल स्टक एक्सचेञ्ज (नेप्से) मा सूचीकृत भएको छ । कम्पनीले प्रतिकित्ता १०० रुपैयाँ अंकित मूल्यका कुल ७५ लाख कित्ता शेयर चैत २१ गते नेप्सेमा सूचीकृत गराएको हो । नेप्सेमा कम्पनीको संस्थापक तर्फको ५२ लाख ५० हजार कित्ता र सर्वसाधारण तर्फको २२ लाख ५० हजार कित्ता शेयर सूचीकृत भएको हो । कम्पनी दोस्रो बजारमा एनएमआईसी सिम्बोलबाट सूचीकृत भएको छ । 

चैत २१ गते सूचीकृत भएको कम्पनीको यी शेयरमध्ये संस्थापक र सर्वसाधारणतर्फको कर्मचारी र सामूहिक लगानीकोष बाहेकका शेयर चैत २४ गतेदेखि कारोबारमा आउनेछन् । संस्थापक र कर्मचारीहरूले सर्वसाधारणमा आईपीओ बाँडफाँट भएको मितिले तीन वर्षसम्म शेयर कारोबार गर्न नपाउने व्यवस्था छ भने सामूहिक लगानीकोषको स्वामित्वमा रहेको शेयर ६ महिनासम्म लइकनमा रहनेछ ।

नेप्सेले कम्पनीको पहिलो कारोबारका लागि न्यूनतम प्रतिकित्ता १०० रुपैयाँ ८० पैसादेखि अधिकतम ३०२ रुपैयाँ ४० पैसासम्मको मूल्य रेञ्ज तोकेको छ । नेप्सेले कम्पनीको वास्तविक प्रतिशेयर नेटवर्थका आधारमा त्यसको तीन गुणासम्मको अधिकतम मूल्य पहिलो कारोबारका लागि तोकेको हो ।गत फागुन २३ गते सर्वसाधारणमा आईपीओ बाँडफाँट गरेको कम्पनीले करिब एक महिनामा शेयर सूचीकृत गरेको देखिन्छ । 

लघु निर्जीवन बीमा व्यवसायी कम्पनीको रुपमा यो कम्पनी २०८० साल बैशाख २६ गतेदेखि सञ्चालनमा रहेको छ । अघिल्लो आर्थिक वर्ष ०७९/८० सम्मको वास्तविक वित्तीय विवरण अनुसार कम्पनी १७ लाख ९९ हजार रुपैयाँ सञ्चित मुनाफामा रहेको छ । सो अवधिसम्म कम्पनीको प्रतिशेयर नेटवर्थ १०० रुपैयाँ ८० पैसा र प्रतिशेयर आम्दानी ८० पैसा छ । गत आर्थिक वर्ष ०८०/८१ सम्मको अपरिस्कृत वित्तीय विवरण अनुसार भने कम्पनी ३० लाख ८८ हजार रुपैयाँ सञ्चित नाफामा रहेको छ ।

चालू आर्थिक वर्षभित्र भने कम्पनीले ६२ लाख ९ हजार रुपैयाँ सञ्चित नाफा गर्ने प्रक्षेपण गरेको छ । लघुबीमा क्षेत्रको दोस्रो कम्पनीको रुपमा धितोपत्र दोस्रो बजारमा यो कम्पनी भित्रिएको हो । यस अघि पहिलो कम्पनीको रुपमा भित्रिएको गाडिएन माइक्रोलाइफको शेयरमूल्य प्रतिकित्ता २ हजार ४०० रुपैयाँभन्दा माथि छ । यस कम्पनीको शेयरमूल्य भने भोलिका दिनमा लगानीकर्ताले गरेको माग र आपूर्तिका आधारमा निर्धारण हुनेछ ।