काठमाडौं । निसान मोटर इण्डियाले आफ्नो प्रोडक्ट लाइनअपमा नयाँ सेभेन-सिटर बी-एमपीभि (बहुउद्देश्यीय वाहन) थप्ने घोषणा गरेको छ । यो घोषणा जापानको योकोहामामा आयोजित ‘ग्लोबल प्रोडक्ट सोकेस’मा निसानले प्रदर्शनमा राखेको दुई नयाँ मोडलहरूमध्ये एक हो ।

नयाँ सेभेन-सिटर बी-एमपीभि: यसले बोल्ड ग्रिल डिजाइन, मस्कुलर स्टाइलिङ, र यात्रुहरूको आरामलाई प्राथमिकता दिँदै सिटिङ क्यापेसिटी बढाएको छ। यो मोडल सन् २०२५ भित्र बजारमा आउने कम्पनीले जनाएको छ । फाइभ-सिटर कम्प्याक्ट एसयुभि निसानको पेट्रोल इन्जिन सेग्मेन्ट डिजाइनबाट प्रेरित यो मोडलले उच्च प्रविधि, प्रिमियम निर्माण र विश्वसनीयता प्रदान गर्ने कम्पनीको दाबी छ । यो २०२६ को आर्थिक वर्षको शुरूआतमा सार्वजनिक हुनेछ ।

स्थानीय उत्पादनका दुवै मोडलहरू चेन्नईस्थित अलायन्स जेभि प्लान्टमा निर्माण गरी भारत र नेपाल लगायत अन्तर्राष्ट्रिय बजारमा पनि उपलब्ध गराइने कम्पनीको भनाइ छ । निसानको नेपाली आधिकारिक वितरक पायोनियर मोटोकर्प प्रा.लि. ले यी नयाँ मोडलहरू नेपालमा पनि ल्याउने घोषणा गरेको छ । कम्पनीसँग नेपालभरि १३ ओटा सेल्स पोइन्टहरू रहेका छन्।

यसले भारतीय बजारमा बढ्दो ग्राहक आकांक्षा अनुरूप आफ्नो उत्पादन विस्तार गर्ने कम्पनीको रणनीतिबारे स्पष्ट पारेको छ । निसानले भारतबाट वार्षिक १ लाख इकाई बिक्री र निर्यातको लक्ष्य राखेको छ । यसैअनुरूप बी-एमपीभि र एसयुभि सेगमेन्टमा प्रतिस्पर्धात्मक मोडेलहरू थप्दै कम्पनीले बजार विस्तार गर्ने योजना बनाएको छ।