काठमाडौं । प्रभु बैंक लिमिटेडले ६ लाख ११ हजार ४४३ कित्ता संस्थापक शेयर विक्रीमा ल्याएको छ । बैंकले पाँच जना सदस्यहरूको नाममा रहेको उल्लेखित कित्ता संस्थापक शेयर विद्यमान संस्थापक शेयरधनीहरूले मात्र खरीद गर्न पाउने गरी विक्रीमा ल्याएको हो ।

यी शेयर खरीद गर्न इच्छुक विद्यमान संस्थापक शेयरधनीहरूले आगामी ३५ दिनभित्र बैंकको केन्द्रीय कार्यालय बबरमहल, काठमाडौंमा आवेदन पेस गर्नुपर्नेछ ।

तोकिएको अवधिभित्र विद्यमान संस्थापक शेयरधनीहरूबाट आवेदन प्राप्त नभएमा अन्य व्यक्ति तथा संस्थाहरूमा यी शेयर विक्री गरिने जानकारी बैंकले दिएको छ । बैंकको संस्थापक शेयरको मूल्य दोस्रो बजारमा प्रतिकित्ता १०९ रुपैयाँ छ ।