काठमाडौं । नेपाल स्टक एक्सचेञ्ज (नेप्से)मा सूचीकृत चार सिमेन्ट कम्पनीले चालू आर्थिक वर्ष (आव)को तेस्रो त्रैमासिक वित्तीय विवरण सार्वजनिक गरेका छन् । 

उक्त वित्तीय विवरणअनुसार दुई कम्पनी घाटामा छन् भने दुई कम्पनी नाफामा छन् । अर्थतन्त्रमा आएको मन्दी र निर्माण क्षेत्रका आएको सुस्तताको असर सिमेन्ट बजारमा पनि देखिएको छ । 

चार सिमेन्ट कम्पनीमध्ये घोराही सिमेन्ट र सोनापुर मिनरल्स एण्ड आयल लिमिटेड घाटामा रहेका हुन् । यी दुई कम्पनीमध्ये घोराही सिमेन्ट चालू आवको तेस्रो त्रैमाससम्ममा रू. ६४ करोड २५ लाखभन्दा बढी घाटामा छ । त्यस्तै सोनापुर मिनरल्स एण्ड आयल लिमिटेड सो अवधिमा रू. २७ करोड ८० लाखमा घाटामा छ । 

नाफामा रहेको सर्वोत्तम सिमेन्टले तेस्रो त्रैमाससम्ममा रू. १२ करोड ७ लाख नाफा कमाएको छ । त्यस्तै, शिवम सिमेन्टले रू.२० करोड ४२ लाख नाफा कमाएको छ । 

यी चार कम्पनीमध्ये सर्वोत्तम सिमेन्टले बुक बिल्डिङ र बाँकी तीन कम्पनीले प्रिमियम मूल्यमा आईपीओ निष्कासन गरेका थिए । 

सिमेन्ट कम्पनीमध्ये नेटवर्थका आधारमा सबैभन्दा अगाडि घोराही सिमेन्ट छ । कम्पनीको प्रतिशेयर नेटवर्थ रू. २२० दशमलव ५५ छ । यो सूचीमा दोस्रोमा रहेको सर्वोत्तम सिमेन्टको प्रतिशेयर नेटवर्थ रू. २१२ दशमलव ७३ छ । 

यी कम्पनीमध्ये सर्वाेत्तम सिमेन्टको शेयर मूल्य सबैभन्दा बढी छ । कम्पनीको शेयर मूल्य प्रतिकित्ता रू.७९० छ । 

सिमेन्ट कम्पनीको वित्तीय अवस्था

कम्पनीको नाम	खुद नाफा	सञ्चालन आम्दानी	चुक्ता पूँजी	प्रतिशेयर आम्दानी रू	प्रतिशेयर नेटवर्थ रू	शेयर मूल्य रू
शिवम सिमेन्ट	204,282	5,997,753	5,027,000	5.42	188.19	502.5
सर्वोत्तम सिमेन्ट	120,769	4,559,099	4,650,000	3.46	212.73	790
घोराही सिमेन्ट	-642,559	3,086,255	4,567,685	-14.07	220.55	484.6
सोनापुर मिनरल्स एण्ड आयल	-278020	1,177,765	3,075,050	-12.05	170.73	448

स्रोत : कम्पनीको तेस्रो त्रैमासिक वित्तीय विवरण र नेप्से ।