काठमाडौं : नेपाल विद्युत् प्राधिकरण (नविप्रा)को कार्यकारी निर्देशकबाट बर्खास्तीमा परेका निवर्तमान काकार्यकारी निर्देशक कुलमान घिसिङले आफ्नो धारणा व्यक्त गरेका छन्। शुक्रबार राजधानीमा आयोजित पत्रकार सम्मेलनमार्फत उनले आफूमाथि भएको निर्णयको विरोध गर्दै पहिलोपटक सार्वजनिक अभिव्यक्ति दिइरहेका बेला भावुक देखिन्थे।

घिसिङले आफूलाई बर्खास्त गर्ने मन्त्रिपरिषद् बैठकको तयारी भइरहेका बेला मकवानपुरको दुर्गम चेपाङ बस्तीमा विद्युत् बाल्ने काममा खटिएको स्मरण गरे। आफैले तयार पारेको प्रेस विज्ञप्ति पढ्दै घिसिङले पत्रकारहरूसंग भने, ‘बर्खास्तीको तयारी भइरहेका बेला चेपाङ बस्तीमा बत्ती बाल्दै थिएँ ।'

“देश र जनताको सेवामा मैले निष्ठापूर्वक कार्य गरें, तर मलाई हटाउने प्रयास हतोत्साहित गर्ने र अपमानित बनाउने नियतका साथ गरिएको हो,” उनले थपे ।

घिसिङले सरकारको निर्णयले आफूजस्ता राष्ट्रसेवक कर्मचारीलाई निरुत्साहित बनाएको आरोप लगाएका छन् । "म विद्युत् प्राधिकरणको कार्यकारी निर्देशकबाट मात्र विदा भएको हुँ, एक जिम्मेवार नागरिकका रूपमा मेरो काम, कर्तव्य र अभिभारा कहिल्यै कम हुने छैन," उनले भने ।

उनले वर्तमान ऊर्जा, जलस्रोत तथा सिंचाइ मन्त्री दीपक खड्कामाथि अनावश्यक नैतिक प्रश्न उठाएको आरोप समेत लगाए । "बक्यौता असुलीमा अवरोध गरियो, आत्मनिर्भर बनाउने मेरो प्रयासलाई कमजोर पारियो", घिसिङको गुनासो गरे ।

बक्यौता उठाउन खोज्दा हटाइयो

डेडिकेटेड र ट्रंक लाइनका प्रिमियम महसुल उठाउने क्रममा आफूलाई बारम्बार अनावश्यक विवरण मागेर अल्झाइने गरिएको आरोप घिसिङले लगाए। "प्राधिकरणले चारपटक लाइन विच्छेद गर्न प्रयास गर्दा माथिल्लो निकायबाट अवरोध आयो", उनले उल्लेख गरे। यही प्रयास नै आफूलाई हटाउने मुख्य कारण भएको दाबी उनको छ।

‘व्यक्तिगत स्वार्थमा होइन, कानुनी दायित्वमा अडिएको थिएँ’

"व्यक्तिको निर्देशन मान्ने कि नियम-कानुन पालना गर्ने? मैले प्राधिकरण र राष्ट्रको हितलाई प्राथमिकता दिएँ", घिसिङले भने। उनले सार्वजनिक कोषप्रति दायित्व निर्वाह गर्ने क्रममा उत्पन्न दबाब र प्रभावलाई स्वीकार नगरेको प्रस्ट पारे।

प्राधिकरणमा आर्थिक तथा प्राविधिक सफलता

घिसिङले आफ्नो नेतृत्वमा प्राधिकरण घाटाबाट नाफामा गएको, सम्पत्ति तीन गुणाले वृद्धि भएको र ८ वर्षमा करिब ४७ अर्बको सञ्चित नाफा भएको तथ्य प्रस्तुत गरे। उनी भन्छन्, “महसुल बढाएर होइन, घटाएर पनि नाफा कमाउन सफल भयौं।”

विद्युत् पहुँच र सेवा विस्तार

उनका अनुसार, २०७२/७३ मा मात्र ५८ प्रतिशत नेपालीमा विद्युत् पहुँच रहेकोमा हाल ९९ प्रतिशत भन्दा बढीमा पहुँच पुगेको छ। विपन्न वर्गका लागि निःशुल्क मिटर जडान गरेर सेवा विस्तार गरिएको छ। गाउँदेखि शहरी क्षेत्रमा स्मार्ट बत्ती स्थापना गरिएको छ।

विदेशमा विद्युत् निर्यात र ऊर्जा आत्मनिर्भरता

उनले भारत र बंगलादेशसम्म विद्युत् निर्यात सुरु भएको, बर्खामा समेत विद्युत् आयात नगरी आत्मनिर्भर भएको उल्लेख गरे। १७ अर्ब रुपैयाँको विद्युत् निर्यात भइसकेको तथ्य उनले सार्वजनिक गरे। अप्पर अरुण जलविद्युत् आयोजना जनताको लगानीमा अगाडि बढाउन खोज्दा सहयोग नपाएको र उल्टो अवरोध भएको घिसिङले बताए। "यदि यो आयोजना प्राधिकरणको स्वामित्वबाट हटाउने प्रयास भयो भने जनस्तरबाट प्रतिरोध हुनेछ", उनले चेतावनी दिए।

 "म सन्तुष्ट छु, राष्ट्रसेवामा गर्व छ"

पत्रकार सम्मेलनको अन्त्यमा घिसिङले भने, "मलाई हतोत्साहित गर्ने प्रयास धेरै भए, तर मैले राष्ट्र र जनताको सेवामा कुनै सम्झौता गरिनँ। यो नै मेरो गर्व हो। उज्यालो नेपाल बनाउने यात्रामा म निरन्तर लागिरहन्छु।"