विराटनगर। उद्योग संगठन मोरङले ३० वर्ष मुनीका युवालाई लक्षित गरी उद्यमशिलता विकासमा आकर्षित गर्न ‘स्टार्टअप एण्ड इनोभेशन कार्यक्रम’लाई परिस्कृत रूपमा ल्याएको छ । व्यावसायिक सोच, विचार तथा अवधारणा भएका युवालाई उद्यमशीलतामा रूपान्तरण गर्ने उद्देश्यका साथ सञ्चालनमा ल्याइएको उक्त कार्यक्रममा सहभागिताका लागि चैत्र ३१ गते सम्म संगठनको वेबसाइटमार्फत आवेदन दिन सकिने बताइएको छ ।
कार्यक्रमलाई प्रभावकारी रूपमा सञ्चालन गर्न आवेदकबाट उद्यमशीलता अवधारणाको प्रस्तुतीकरण गराई उत्कृष्ट १५ जना स्टार्टअप उद्यमी छनोट गरिने बताइएको छ । छनोट भएका उद्यमीलाई नि:शुल्क रूपमा व्यावसायिक योजना तर्जुमा, व्यावसायिक योजना अनुरूप आवश्यक पर्ने प्राविधिक विषयमा मेन्टरसिप, कोचिङ, परामर्श सेवा, नेटवर्क विस्तारको अवसर प्रदान गरिने संगठनले जानकारी दिएको छ । ३ महीनासम्म संगठनको मेन्टरसिपमा रहने स्टार्टअपलाई व्यावसायिक विकासमा थप सहयोग पुर्याउन उक्त अवधिमा बिजनेश क्यानभास मोडेल, बिजनेश हेल्थ चेकअपका साथै हाटबजार लगायत कार्यक्रम आयोजना गरी उत्कृष्ट हुन सफल ३ स्टार्टअपलाई पुरष्कृत गर्ने संगठनको योजना छ ।
