वीरगञ्ज । राजावादीको आन्दोलनको क्रममा आगजनीमा पत्रकार सुरेश रजक मारिएको र सञ्चारमाध्यमहरूमा भएको तोडफोडका घटनाको विरोधमा वीरगञ्जका पत्रकारहरूले र्याली र विरोधसभा आयोजना गरेका छन् ।
नेपाल पत्रकार महासंघ पर्साको अगुवाइमा शनिबार बिहान घण्टाघरबाट शुरु भएको विरोध र्याली नगर परिक्रमा गर्दै घण्टाघरमै पुगेर विरोध सभामा परिणत भएको थियो । नेपाल पत्रकार महासंघका केन्द्रीय सचिव अशोक तिवारीले पत्रकार हत्याको विरोधमा महासंघले चरणबद्ध आन्दोलन गर्ने चेतावनी दिए ।
पत्रकार महासंघ मधेश प्रदेशका अध्यक्ष श्याम बन्जाराले कुनै पनि बहानामा पत्रकार र सञ्चारमाध्यम माथि भएको आक्रमण सह्य नहुने बताए । यस्ता आपराधिक गतिविधिको विरोधमा सम्पूर्ण सञ्चारकर्मी ऐक्यबद्ध हुनुपर्नेमा अध्यक्ष बन्जाराको जोड थियो ।
पत्रकार महासंघ पर्साका अध्यक्ष ओमप्रकाश खनालले सुरक्षित र स्वतन्त्र प्रेसबिना लोकतन्त्र सफल नहुने र लोकतन्त्रबिना प्रेस स्वतन्त्रता हुन नसक्ने दाबी गरे । लोकतन्त्रको विकल्प राजतन्त्र कदापि नहुने तर्क गर्दै राजावादीको प्रदर्शनका क्रममा पत्रकार मारिएको घटनाले राजावादीहरूको पत्रकारप्रतिको दृष्टिकोण स्पष्ट भएको दाबी गरे ।
