काठमाडौं । यो साताको पाँच कारोबार दिनमा चार कारोबार दिन बजार निरन्तर बढ्दा लगानीकर्ताको सम्पत्ति मूल्य अर्थात् कुल बजार पूँजीकरण १ खर्ब ९ अर्ब रुपैयाँभन्दा बढीले वृद्धि भएको छ । 

गत साताको अन्तिम कारोबार दिनको तुलनामा यो साताको अन्तिम दिन कुल बजार पूँजीकरण उल्लेख्य रकमले बढेको हो । नेप्सेका अनुसार गत साताको अन्तिम कारोबार दिन ४२ खर्ब ९३ अर्ब ७४ करोड ८३ लाख रुपैयाँ रहेको कुल बजार पूँजीकरण यो साताको अन्तिम कारोबार दिन ४४ खर्ब २ अर्ब ७६ करोड ६६ लाख रुपैयाँ कायम भएको हो । 

गत साताभन्दा यो साता समग्र धितोपत्र कारोबार मापक नेप्से परिसूचक २ दशमलव ५४ प्रतिशत बढेकाले कम्पनीको पूँजीकरणमा सकारात्मक प्रभाव परेको हो । चार दिन बजार बढ्दा यो साता नेप्से परिसूचक ६५ दशमलव ७३ अंक माथि उक्लिएको हो । 

गत साता २ हजार ५८८ दशमलव ६२ विन्दुमा रहेको नेप्से परिसूचक यो साता बजार बन्द हुँदा २ हजार ६५४ दशमलव ३५ विन्दुमा कायम भएको हो । समग्र धितोपत्र कारोबार मापक नेप्सेसँगै ठूला कम्पनीहरूको मात्र कारोबार मापक सेन्सेटिभ इन्डेक्स यो साता २ दशमलव ३३ प्रतिशत बढेको छ । सेन्सेटिभ इन्डेक्स ४४६ दशमलव ८१ विन्दुमा पुगेको हो ।

यो साता पाँच कारोबार दिनमा ३६ अर्ब ७ करोड रुपैयाँभन्दा बढीको ७ करोड १० लाखभन्दा बढी कित्ता धितोपत्र कारोबार भएको छ । गत साता चार कारोबार दिनमा २२ अर्ब ४० करोड रुपैयाँभन्दा बढीको ४ करोड ४३ लाखभन्दा बढी कित्ता धितोपत्र कारोबार भएको थियो । गत साताको तुलनामा यो साता कुल कारोबार रकम १३ अर्ब ६७ करोड रुपैयाँले र कारोबार कित्ता १६ लाख १३ हजारभन्दा बढीले वृद्धि भएको हो । 

औसत कारोबार रकम १ अर्ब ६१ करोड रुपैयाँभन्दा बढी र कारोबार कित्ता ३१ लाख १९ हजारभन्दा बढी भएको जानकारी समेत नेप्सेले दिएको छ । गत साता औसतमा ५ अर्ब ६० करोड १८ लाख रुपैयाँभन्दा बढीको ५६ लाख १ हजारभन्दा बढी कित्ता धितोपत्र कारोबार भएकोमा यो साता औसतमा ७ अर्ब २१ करोड रुपैयाँभन्दा बढीको १ करोड ४२ लाखभन्दा बढी कित्ता धितोपत्र कारोबार भएको हो ।

बैंकिङ प्रणालीमा देखिएको तरलता विस्तारै धितोपत्र दोस्रो बजारमा प्रयोगमा आइरहेको अनुमान जानकारहरूले लगाएका छन् । साथै निक्षेपको ब्याजदर घटिरहेको अवस्थामा दोस्रो बजारमा सूचीकृत धेरै राम्रा कम्पनीको शेयर मूल्य न्यून रहेकाले पनि लगानीकर्ता बजारप्रति आकर्षित भएको अनुमान जानकारहरूको छ । 

सातागत परिसूचकको तुलना

विवरण	यो साता	गत साता	फरक	फरक प्रतिशत
नेप्से परिसूचक (अंक)	2,654.35	2,588.62	65.73	2.54
सेन्सेटिभ इन्डेक्स (अंक)	446.81	436.62	10.19	2.33
कारोबार रकम (रू. हजारमा)	36,078,736.08	22,407,408.24	13,671,327.84	61.01
कारोबार कित्ता	71,083,474.00	44,387,338.00	26,696,136.00	60.14
औसत कारोबार रकम (रू. हजारमा)	7,215,747.22	5,601,852.06	1,613,895.16	28.81
औसत कारोबार कित्ता	14,216,694.80	11,096,834.50	3,119,860.30	28.11
कुल बजार पूँजीकरण (रू. दश लाखमा)	4,402,766.69	4,293,748.30	109,018.39	2.54

स्रोत : नेपाल स्टक एक्सचेञ्ज (नेप्से) ।

अन्य समूहको परिसूचक सर्वाधिक ९.४० प्रतिशत बढ्यो 

यो साता समग्र धितोपत्र मापक नेप्से परिसूचक बढेको अवस्थामा दुई समूहगत परिसूचक भने घटेका छन् । गत साताको तुलनामा यो साता वित्तको २ दशमलव ८५ प्रतिशत र म्युचुअल फण्डको परिसूचक शून्य दशमलव ६४ प्रतिशत घटेको नेप्सेको तथ्याङ्कले देखाउँछ । 

यो साता अन्य समूहको परिसूचक सर्वाधिक ९ दशमलव ४० प्रतिशत बढेको छ । त्यस्तै, उत्पादन तथा प्रशोधनको ५ दशमलव ३४ प्रतिशत, लगानीको ४ दशमलव ७८ प्रतिशत, जीवन बीमाको ३ दशमलव ९९ प्रतिशत, विकास बैंकको ३ दशमलव ३९, निर्जीवन बीमाको २ दशमलव ९४ प्रतिशत, होटल तथा पर्यटनको २ दशमलव ७६ प्रतिशत, लघुवित्तको १ दशमलव ३४ प्रतिशत, जलविद्युतको १ प्रतिशत, व्यापारको शून्य दशमलव ९९ प्रतिशत र बैंकिङको शून्य दशमलव ३१ प्रतिशत परिसूचक बढेको हो । 

यो साता सर्वाधिक परिसूचक बढ्ने अन्य समूहमा ६ कम्पनी सूचीकृत छन् । नेपाल दूरसञ्चार कम्पनी, नेपाल पुनर्बीमा कम्पनी, नेपाल रिपब्लिक मिडिया, मुक्तिनाथ कृषि कम्पनी, नेपाल वेयरहाउजिङ कम्पनी र हिमालयन रिइन्स्योरेन्स कम्पनी छन् । यी कम्पनीहरूको शेयर मूल्य बढेकाले अन्य समूहको परिसूचकमा वृद्धि देखिएको हो । 

साताव्यापी समूहगत परिसूचकमा आएको परिवर्तन

विवरण	यो साता	गत साता	फरक प्रतिशत
अन्य	2,083.29	1,904.28	9.4
उत्पादन तथा प्रशोधन	7,080.55	6,721.87	5.34
लगानी	104.33	99.57	4.78
जीवन बीमा	13,074.30	12,573.12	3.99
विकास बैंक	5,560.96	5,378.55	3.39
निर्जीवन बीमा	12,788.96	12,424.02	2.94
होटल तथा पर्यटन	6,829.26	6,645.96	2.76
लघुवित्त	4,903.00	4,838.26	1.34
जलविद्युत्	3,706.62	3,669.77	1
व्यापार	4,460.99	4,417.33	0.99
बैंकिङ्ग	1,350.74	1,346.54	0.31
म्युचुअल फण्ड	20.09	20.22	-0.64
वित्त	2,564.75	2,639.96	-2.85

स्रोत : नेपाल स्टक एक्सचेञ्ज (नेप्से) ।