काठमाडौं । छ्याङ्दी हाइड्रोपावर लिमिटेडले शत प्रतिशत हकप्रद शेयर निष्कासन गर्ने प्रस्तावलाई वैशाख २८ गते स्वीकृति प्रदान गर्ने भएको छ । वैशाख ५ गते बसेको कम्पनीको सञ्चालक समिति बैठकले अग्रवाल भवन कमलपोखरी, काठमाडौंमा बिहान ११ बजे सभा गर्ने निणर्य गरेको हो ।

सभाले गत आर्थिक वर्ष ०७८/७९ को वार्षिक प्रतिवेदनसहितका वित्तीय विवरणहरू पारित गर्नुका साथै चालू आर्थिक वर्षको लागि लेखापरीक्षक नियुक्ति र निजको पारिश्रमिक निर्धारणको विषयलाई समेत टुंग्याउनेछ ।

साथै सञ्चालक समितिको निर्वाचन गर्ने कार्यक्रमसमेत सभाका लागि तय भएको छ । कम्पनीले ४० प्रतिशत हकप्रद शेयर जारी गर्ने निणर्लाई रद्द गरी शत प्रतिशत हकप्रद शेयर जारी गर्ने निणर्यलाई स्वीकृति दिनेछ ।

यसअघि कम्पनीले ४० प्रतिशत हकप्रद शेयर जारी गर्ने प्रस्ताव २०७८ साल पुस ३० गते सम्पन्न वार्षिक साधारण सभाबाट पारित गरेको थियो । हाल कम्पनीको चुक्तापूँजी रू. ३८ करोड ६९ लाख ७७ हजार ५०० रहेको छ । कम्पनीको प्रस्तावित हकप्रद शेयर विक्री गर्न अनुमति पाएमा चुक्तापूँजी रू. ७७ करोड ३९ लाख ११ हजार पुग्नेछ । कम्पनीले ४ मेगावाट क्षमताको जलविद्युत् आयोजना निर्माण सम्पन्न गरी विद्युत् उत्पादन गर्दै आएको छ ।

चालू आर्थिक वर्षको दोस्रो त्रैमाससम्म कम्पनीले रू. ५ करोड २६ लाखभन्दा बढीको विद्युत् विक्री गरेको छ । यस अवधिसम्म कम्पनी रू. १ करोड १२ लाखभन्दा बढी खुद नोक्सानीमा रहेको छ । पछिल्लो समय जलविद्युत् कम्पनीहरूलाई आयोजना निर्माणका लागि लिएको कर्जा भुक्तानीका लागि हकप्रदमार्फत पूँजी जुटाउन सक्ने व्यवस्था गरिएको छ । सोही व्यवस्थाअनुसार कम्पनीले हकप्रदमार्फत पूँजी जुटाउन लागेको हो ।

सूचना हेर्न यहाँ क्लिक गर्नुहोस्

Chhyangdi Hydropower Ltd. (CHL)

Chhyangdi Hydropower Ltd. (CHL)