चितवन । भरतपुरको चितवन एक्स्पो सेन्टरमा चौथो चितवन स्वदेशी जुत्ता चप्पल प्रवर्द्धन तथा व्यापार मेला २०८१/८२ शुरू भएको छ । स्वदेशी उत्पादनको प्रर्वद्धन गर्ने उद्देश्यसहित यही बिहीबार देखि बैशाख २० गतेसम्म उक्त मेला हुनेछ ।
चितवन उद्योग संघ र नेपाली जुत्ता घरको संयुक्त आयोजनामा शुरू भएको चौथो चितवन फुटवेयर एक्स्पो चितवन जुत्ताचप्पल मेलामा ६ ओटा कम्पनीको स्वदेशी उद्योगबाट उत्पादित एक हजारभन्दा बढी प्रकारका जुत्ता चप्पल राखिएका छन् ।
जुत्ता चप्पल मेलामा ३० भन्दा बढी स्टल राखिएको नेपाली जुत्ता घरका अध्यक्ष होमनाथ उपाध्यायले जानकारी दिए । स्वदेशी उत्पादनका बारेमा आमउपभोक्तालाई स्थलगत अवलोकन गराई आफ्ना उत्पादनका बारेमा जानकारी गराउने उद्देश्यले चौथो पटक मेला आयोजना गरिएको उनले बताए ।
मेलामा बिएफ डियरहिल सुज, फस्ट वाक सुज, शिखर सुज, रन सुज, स्मार्ट सुज, सु ल्यान्ड सुज, हाईलाइफ ब्रान्डका जुत्ता, चप्पल तथा छालाबाट उत्पादित सामग्री उपलब्ध रहेका छन् । नेपालमा एक हजार पाँच सय उद्योग रहेको नेपाली जुत्ता चप्पल उद्योगमा ३० अर्ब रुपैयाँको लगानी रहेको छ ।
प्रथम दोस्रो र तेस्रो जुत्ताचप्पल मेला आयोजना गरिसक्दा ग्राहकको उत्साहजनक उपस्थितले मेला सफल र राम्रो भएकाले पुन: चौथोपटक मेला आयोजना गरिएको उनले बताए ।
करिब एक महीनासम्मका सञ्चालन हुने मेलामा १ करोड ५० लाख रुपैयाँको कारोबार हुने अपेक्षा गरिएको छ । मेलामा प्रत्येक जुत्ता चप्पल खरिदमा १५ देखि ५० प्रतिशतसम्म छुटको व्यवस्था गरिएको छ ।
