काठमाडौं। नेपाल टेलिकमले २०८१ सालको एसईईमा सहभागी परीक्षार्थीका लागि ‘एसईई अफर २०८१’ ल्याएको छ । यसअन्तर्गत कम्पनीले एसईई दिएका परीक्षार्थीलाई रू. २० मा सिमकार्ड उपलब्ध गराउने बताइएको छ र त्यसमा ‘बोनस अन रिचार्ज’ पनि उपलब्ध हुने बताइएको छ । एसईई अफर तथा बोनस अन रिचार्ज चैत १५ देखि २०८२ असार ३० गतेसम्म उपलब्ध हुनेछ ।

सिमकार्ड ‘एक्टिभ’ गरिसकेपछि ३० दिनका लागि विभिन्न अफर उपलब्ध हुनेछन् । पहिलेदेखि नै टेलिकमको सिमकार्ड प्रयोग गर्ने परीक्षार्थीका लागि समेत सोही सिमकार्डमा अफर उपभोग गर्न सकिने व्यवस्था गरिएको छ । नयाँ सिम प्राप्त गरेका परीक्षार्थीले सिमकार्डमा मेन ब्यालेन्सको रूपमा उपलब्ध हुने ९ रुपैयाँ ८० पैसाबाट जुनसुकै नेटवर्कमा कल गर्न, एसएमएस पठाउन वा डाटा चलाउन सक्नेछन् । यसका अतिरिक्त ३० दिनसम्म प्रतिदिन टेलिकमको नेटवर्कभित्र कुराकानी गर्न २० मिनेट अन–नेट भ्वाइस सेवा, १० ओटा अन–नेट एसएमएस र ५०० एमबी डाटा समेत अफरअन्तर्गत उपलब्ध हुनेछ ।

नयाँ सिम प्राप्त गर्न परीक्षार्थीले एसईईको प्रवेश पत्र वा कक्षा १० को मार्कसिटको फोटोकपी, एक प्रति फोटो र आफ्नो वा अभिभावकको नागरिकता, राष्ट्रिय परिचयपत्र लगायतका सरकारी परिचयपत्रको फोटोकपी संलग्न गरी फाराम भर्नुपर्नेछ ।