काठमाडौं । कात्तिक मसान्तसम्ममा पाँच वित्त कम्पनी घाटामा रहेका छन् । 

नेपाल राष्ट्र बैंकले सार्वजनिक गरेको तथ्यांकअनुसार कात्तिक मसान्तसम्ममा वेष्ट फाइनान्स, समृद्धि फाइनान्स, पोखरा फाइनान्स, रिलायन्स फाइनान्स र गुहेश्वरी मर्चेण्ट एण्ड फाइनान्स घाटामा रहेका हुन् । तीमध्ये गुहेश्वरी मर्चेण्ट एण्ड फाइनान्सले सबैभन्दा बढी रू. १४ करोड ५७ लाख घाटा व्यहोरेको छ । 

कात्तिक मसान्तसम्ममा सर्वाधिक घाटा व्यहोर्ने कम्पनीको सूचीमा दोस्रोमा रिलायन्स फाइनान्स छ । यो कम्पनी सो अवधिसम्म रू. १० करोड ५५ लाख घाटामा छ । 

तर, धितोपत्र दोस्रो बजारमा यी कम्पनीको शेयर मूल्य ६ सयभन्दा बढी छ । पोखरा फाइनान्सको शेयर मूल्य पछिल्लो कारोबार दिन (गत बिहीवार) प्रतिकित्ता रू. ६५७ मा बन्द भएको छ । त्यस्तै, गुहेश्वरी मर्चेण्ट एण्ड फाइनान्सको शेयर मूल्य पछिल्लो कारोबार दिन रू. ६१७ कायम भएको छ । 

अर्बौं नाफा कमाएको वाणिज्य बैंकको शेयर मूल्य भने प्रतिकित्ता ३ सयको हाराहारीमा छ । 

यस्तोमा प्रश्न उठ्छ– घाटामा रहेका वित्त कम्पनीको शेयरमा किन आकर्षण छ ? जानकार भन्छन्– वित्त कम्पनीहरूको शेयरको माग बढी हुनु । यी कम्पनीको शेयर संख्या न्यून हुँदा आपूर्ति कम हुने भएकाले माग बढी भएको एक ब्रोकरले बताए । 

१० कम्पनी नाफामा

नेपाल स्टक एक्सचेञ्ज (नेप्से)मा सूचीकृत १५ कम्पनीमध्ये १० कम्पनी नाफामा छन् । तीमध्ये प्रोग्रेशिभ फाइनान्सले सबैभन्दा बढी नाफा कमाएको छ । यस कम्पनीले कात्तिक मसान्तसम्ममा रू. १५ करोड ८८ लाख नाफा कमाएको हो । गत आवको कात्तिक मसान्तसम्ममा यस कम्पनी रू. १० करोड २० लाख घाटामा थियो । 

कात्तिक मसान्तसम्ममा सर्वाधिक नाफा कमाउनेको सूचीमा दोस्रोमा मञ्जुश्री फाइनान्स छ । यस कम्पनीले चालू आवको कात्तिक मसान्तसम्ममा रू. १५ करोड ३३ लाख नाफा कमाएको छ । यो अवधिमा सबैभन्दा कम नाफा कमाउने वित्त कम्पनीमा नेपाल फाइनान्स छ । यस कम्पनीले रू. ६८ लाख नाफा कमाएको छ । 

कम्पनीको नाम	नाफा/नोक्सान रू. दश लाखमा		पछिल्लो शेयर मूल्य रू.
	२०८१ कात्तिक मसान्त	२०८० कात्तिक मसान्त
प्रोग्रेशिभ फाइनान्स	158.81	-102.06	676
मञ्जुश्री फाइनान्स	153.39	113.92	707
आइसिएफसी फाइनान्स	84.58	19.27	717.9
जानकी फाइनान्स	75.48	7.6	885.9
गुडवील फाइनान्स	56.32	-39.77	842
सेन्ट्रल फाइनान्स	50.88	-18.39	641
गोर्खाज फाइनान्स	36.13	52.02	720
मल्टीपर्पस फाइनान्स	24.24	8.72	740
श्री इन्भेष्टमेन्ट एण्ड फाइनान्स	8.89	3.01	629.8
नेपाल फाइनान्स	6.82	-22.44	1087
वेष्ट फाइनान्स	-23.32	-21.94	776
समृद्धि फाइनान्स	-26.37	-93.97	791
पोखरा फाइनान्स	-64.27	-51.82	657
रिलायन्स फाइनान्स	-105.56	46.81	627
गुहेश्वरी मर्चेण्ट एण्ड फाइनान्स	-145.73	-53.1	617

स्रोत : नेपाल राष्ट्र बैंक र नेप्से