काठमाडौं । मंगलवार नेपाल स्टक एक्सचेन्ज (नेप्से)मा हाथवे इन्भेष्टमेन्ट नेपाल लिमिटेडको आईपीओ सूचीकृत भएको छ । कम्पनीको २ करोड ३४ लाख कित्ता साधारण शेयर सूचीकृत भएको हो । अब यो शेयर भोलि (बुधवार)देखि धितोपत्रको दोस्रो बजारमा कारोबारमा आउनेछ । 

नेप्सेले कम्पनीको पहिलो कारोबारको लागि प्रतिकित्ता रू. ९५ दशमलव ०९ देखि २८५ दशमलव २७ ओपन रेञ्ज तोकिदिएको छ । यही मूल्य रेञ्जका आधारमा कम्पनीको शेयर भोलिदेखि दोस्रो बजारमा आउनेछ । 

कम्पनीले सर्वसाधारण शेयरधनीसहित वैदेशिक रोजगारीमा गएका नेपाली, सामूहिक लगानी कोष र कर्मचारी सहित २९ लाख ३६ हजार २५ कित्ता र कम्पनीका संस्थापक शेयरधनीहरूले लगानी गरेको २ करोड ४ लाख ७५ हजार कित्ता गरेर कुल २ करोड ३४ लाख कित्ता साधारण शेयर सूचीकृत गराएको हो । 

शेयर सूचीकरणपश्चात दिनुपर्ने सेवा काठमाडौंको लाजिम्पाटस्थित ग्लोबल आइएमई क्यापिटल लिमिटेडबाट हुने कम्पनीले जानकारी दिएको छ । कम्पनीको स्टक सिम्बोल एचएटीएचवाई रहेको छ ।