काठमाडौं । काठमाडौंको वसन्तपुरस्थित हनुमानढोका दरबारमा चीर ठड्याइएको छ ।

बिहान ७ बजेर ४७ मिनेटको साइतमा मानन्धर समुदायले रङ्गीचङ्गी ध्वजापतकासहित सजाइएको बाँसको तीन खण्डे चीर ठड्याएसँगै होली पर्व शुरू भएको हो । होलीलाई असत्यमाथि सत्यको विजयको रूपमा हरेक वर्ष फागु पूर्णिमाका दिन मनाउने गरिन्छ ।

नेवार समुदायले चीर ठड्याउनुलाई होलीको शुरुआतका रूपमा लिने गरेका छन् । असत्यमाथि सत्यको जीतका रूपमा चीर ठड्याइएको स्थानीय बताउँछन् ।

यससँगै होली पर्वको रौनक शुरु भएको छ । यस वर्षको होली पर्वको मुख्य दिन चैत ११ र १२ गते परेको छ। ११ गते हिमाली तथा पहाडी जिल्लामा र १२ गते तराई जिल्लामा होलीको सार्वजनिक बिदा दिइएको छ ।