काठमाडौं । नेपाल र बंगलादेशबीच गत बिहीवार भएको ४० मेगावाट विद्युत विक्री सम्झौता (पीएसए)को स्वतन्त्र ऊर्जा उत्पादकहरूको संस्था, नेपाल (इप्पान)ले स्वागत गरेको छ ।  काठमाडौंमा भएको यो सम्झौतालाई ऐतिहासिक सम्झौताको रूपमा नेपालले लिएको इप्पानले जनाएको छ । 

भारतसँग १० वर्षमा १० हजार मेगावाट बिजुली निर्यातका लागि दीर्घकालीन सम्झौता भइसकेको अवस्थामा बंगलादेशसँग भएको यो सम्झौताले नेपालको बिजुलीको बजार बंगलादेशलाई खुलेको नभइ दुई देशबीच सरकार-सरकारसँगै निजी-निजी क्षेत्रबीचमा ऊर्जा विकास र विस्तारका लागि सहकार्य, साझेदारी र लगानी आदानप्रदानका लागि बाटो खुलेको इप्पानको भनाइ छ ।

बंगलादेश सरकारले सन् २०३९ भित्र नेपालबाट ९ हजार मेगावाट बिजुली आयात गर्ने लक्ष्य राखेको छ । नेपाल सरकारले आगामी १० वर्षभित्र ५ हजार मेगावाट निर्यात गर्ने लक्ष्य राखेको छ । लक्ष्यलाई कार्यान्वयन गर्नका लागि नेपालको निजी क्षेत्र तयार रहेको इप्पानले जनाएको छ । 

सम्झौतासँगै नेपाल विद्युत प्राधिकरणले रोकिराखेको विद्युत खरीद सम्झौता (पीपीए) पूर्णरूपमा खुला हुनुपर्ने इप्पानको माग छ । 'निजी क्षेत्रलाई विद्युत् निर्यातका लागि अनुमतिपत्र दिने, बैंक तथा वित्तीय संस्थाले ऊर्जामा लगानी बढाउने, सरकारले ऊर्जा उत्पादनका लागि थप सहुलियतहरू घोषणा गर्ने तथा ऊर्जा आयोजना निर्माणका लागि हाल देखिएका नीतिगत, प्रशासनिक तथा प्रक्रियागत समस्याहरूको समाधानका लागि सरकार तत्पर हुनुपर्ने आवश्यकता हामीले देखेका छौं,' इप्पानले जारी गरेको विज्ञप्तिमा उल्लेख छ । 

 भारत र बंगलादेशमा लक्ष्य अनुसारको निर्यातका लागि तत्काल नीतिगत र प्रक्रियागत सुधारका लागि पनि इप्पानले सरकारसँग आग्रह गरेको छ ।