वीरगञ्ज  । वीरगञ्जको आईसीपी भन्सार कार्यालयले चालू आर्थिक वर्ष (आव) २०८१/८२ को पहिलो ५ महीनामा लक्ष्यको झण्डै ७४ प्रतिशत राजस्व उठाएको छ । चालू आवको साउनदेखि मंसिरसम्मको यो भन्सारबाट ६४ अर्ब ५९ करोड रुपैयाँ राजस्व उठेको हो । 

देशको मुख्य नाकामा रहेको भन्सार कार्यालयलाई सो अवधिका लागि ८७ अर्ब ३३ करोड रुपैयाँ उठाउने लक्ष्य तोकिएको थियो । भन्सारले गत आवको समीक्षा अवधिको लक्ष्य र प्रगतिको तुलना गर्दा यो वर्ष उठाएको राजस्वको आकार ११ प्रतिशतले बढी हो । 

आव २०८०/८१ मा भन्सारले लक्ष्यको करीब ६३ प्रतिशत उठाएको थियो । त्यसबेला ९८ अर्ब ५६ करोड रुपैयाँ लक्ष्य दिइएकोमाा ६१ अर्ब ९९ करोड रुपैयाँ संकलन भएको भन्सारको बेभसाइटमा प्रकाशित तथ्यांकमा उल्लेख गरिएको छ ।

गत आवको तुलनामा चालू आवका लागि भन्सारले उठाउनुपर्ने राजस्व लक्ष्यको आकार भने घटेको देखिन्छ । भन्सार विभागले चालू वर्षको साउनदेखि मंसिरसम्मका लागि करीब ११ अर्ब रुपैयाँ लक्ष्य घटाएको छ ।

१३ शीर्षकमा राजस्व 
यो भन्सारले विभिन्न १३ शीर्षकमा राजस्व लिएको देखिन्छ । सबैभन्दा बढी मूल्यअभिवृद्धितर्फ उठाएको छ ।  मूल्यअघिवृद्धि कर २६ अर्ब १८ करोड रुपैयाँ संकलन भएको छ । भन्सार महशुल २४ अर्ब ८ करोड रुपैयाँ उठाएको छ ।  अन्तःशुल्क ४ अर्ब ८० करोड रुपैयाँ उठेको छ ।