काठमाडौं। नेपाल उद्योग वाणिज्य महासंघ र थाईल्यान्डको थाई चेम्बर अफ कमर्स एण्ड बोर्ड अफ ट्रेड बीच आपसी सहकार्य तथा व्यापार-व्यवसाय अभिवृद्धिका विषयमा सहमति भएको छ।
दुवै देशका प्रधानमन्त्रीहरूको उपस्थितिमा आज बैङ्ककमा भएको सहमतिपत्रमा महासंघका अध्यक्ष चन्द्र प्रसाद ढकाल र बोर्ड अफ ट्रेडका अध्यक्ष सानन अंगुबोल्कुलले हस्ताक्षर गरेका छन्।

यस सहमतिले नेपाल र थाईल्यान्ड बीच व्यापारिक सम्बन्धलाई सुदृढ गर्ने, आर्थिक सहकार्यलाई प्रवर्द्धन गर्ने, तथा व्यापार र लगानी विस्तारका लागि संरचित रूपरेखा तयार गर्ने लक्ष्य राखेको छ। साथै, दुई देश बीचको व्यापारिक सहकार्यलाई थप मजबूत बनाउने र आर्थिक सहकार्यलाई विस्तार गर्न महत्वपूर्ण योगदान गर्ने विश्वास गरिएको छ।

द्विपक्षीय सहमति अन्तर्गत दुवै पक्षले व्यापार प्रवर्द्धन, संयुक्त उद्यमको सुविधा, व्यापारिक जानकारी आदानप्रदान, र औद्योगिक सहकार्यलाई समर्थन गर्ने प्रतिबद्धता व्यक्त गरेका छन् । साथै, व्यापार मेला, व्यवसायिक फोरम, र विशेष आर्थिक कार्यक्रमहरूमा सहभागितालाई प्रोत्साहन गर्ने विषय सहमतिपत्रमा समावेश गरिएको छ । यस्तै, विवाद समाधान प्रणालीलाई प्रवर्द्धन गर्ने र प्राविधिक विशेषज्ञता तथा तालिम आदानप्रदानलाई सशक्त बनाउने विषय पनि सहमतिपत्रमा उल्लेख छ ।

सो अवसरमा बोल्दै, महासंघका अध्यक्ष ढकालले नेपाल–थाईल्यान्ड बीच भएको यस सहमतिले दुवै देशको आर्थिक सहकार्यका लागि नयाँ आधारशिला तयार गरेको बताए ।
“दुई देश बीच व्यापार-व्यवसायको सहकार्यका पर्याप्त सम्भावनाहरू रहेका छन्। महासंघ र थाईल्यान्डको बोर्ड अफ ट्रेड बीचको आपसी सहकार्यले व्यापार र लगानीका लागि नयाँ अवसरहरू खोल्ने विश्वास छ। जसले दुवै राष्ट्रका व्यवसायहरूलाई फस्टाउने अवसर प्रदान गर्नेछ,” अध्यक्ष ढकालले भने ।

थाई चेम्बर अफ कमर्स एण्ड बोर्ड अफ ट्रेडका अध्यक्ष अंगुबोल्कुलले यो साझेदारीले दुवै देशका व्यापारिक समुदायहरूका लागि नयाँ अवसरहरू सिर्जना गर्ने बताए ।

बिम्सटेक (बङ्गालको खाडी बहुक्षेत्रीय प्राविधिक तथा आर्थिक सहयोग पहल) को छैटौं शिखर सम्मेलनको अवसरमा गरिएको यो सहमतिपत्र तीन वर्षसम्म लागू हुनेछ र नेपाली तथा थाई व्यवसायहरू बीच निरन्तर सहकार्यका लागि एक मजबूत आधारको रूपमा काम गर्नेछ । महासंघले थाईल्यान्डको बोर्ड अफ ट्रेडसँग मिलेर यस सम्झौताका लक्ष्यहरू सफलतापूर्वक कार्यान्वयन गर्न तथा आपसी सहकार्यका नयाँ सम्भावनाहरू खोज्न तत्पर रहेको छ।

प्रधानमन्त्री केपी शर्मा ओली सहित नेपाली प्रतिनिधि मण्डल यही चैत १९ गतेदेखि २३ गतेसम्म थाईल्यान्डको औपचारिक भ्रमण तथा बिम्सटेकको छैटौं शिखर सम्मेलनमा सहभागी हुनेछन्।