काठमाडौं । सानिमा म्युचुअल फण्डअन्तर्गत सञ्चालित सानिमा लार्ज क्याप फण्ड र सानिमा ग्रोथ फण्डले फागुनको खुद सम्पत्ति मूल्य विवरण सार्वजनिक गरेका छन् ।
उक्त विवरण अनुसार यी दुवै फण्डको न्याभ माघको तुलनामा फागुनमा घटेको छ । सानिमा लार्ज क्याप फण्डको न्याभ माघ मसान्तमा रू. ९ दशमलव ६८ रहेकोमा फागुन मसान्तमा रू. ९ दशमलव १२ कायम भएको छ ।
त्यस्तै सानिमा ग्रोथ फण्डको न्याभ माघ मसान्तमा रू. ९ दशमलव ९९ रहेकोमा फागुन मसान्तमा रू. ९ दशमलव ८७ मा झरेको हो । त्यस्तै यस फण्डको नोक्सानी माघको तुलनामा फागुनमा बढेको छ । माघ मसान्तमा फण्डले रू. ५ लाख ३३ हजार नोक्सानी व्यहोरेकोमा फागुनमा बढेर रू. ८७ लाख पुगेको हो ।
फागुनमा फण्डको जम्मा आम्दानी रू. २ लाख ४५ हजार ऋणात्मक रहेकाले र खर्चमा वृद्धि भएकाले नोक्सानी बढेको हो । माघ मसान्तमा फण्डको जम्मा खर्च रू. ७४ लाख ७२ हजार भएकोमा फागुन मसान्तमा बढेर रू. ८४ लाख ८५ हजार पुगेको छ । यस फण्डले फागुन मसान्तसम्ममा सूचीकृत शेयरमा रू. ११ करोड ३२ लाख लगानी गरेको छ ।
सानिमा लार्ज क्याप फण्डले फागुन मसान्तमा रू. २ करोड ७५ लाख नाफा कमाएको छ । यो नाफा माघ मसान्तको तुलनामा ७० प्रतिशत कमी आएको हो । माघ मसान्तमा फण्डले रू. ९ करोड ४७ लाख नाफा कमाएको थियो । फागुनमा फण्डको आम्दानीमा कमी आएकाले नाफा घटेको हो ।
माघ मसान्तमा फण्डले रू. १० करोड ६४ लाख आम्दानी गरेकोमा फागुन मसान्तमा घटेर रू. ४ करोड ८ लाखमा झरेको छ ।
