काठमाडौं । रोटरी क्लब अफ त्रिपुरेश्वर काठमाडौंले १० थान ह्विलचियर वितरण गरेको छ । क्लवले नेपालको अग्रणी र उत्कृष्ट फिजियोथेरापी, पुनर्स्थापना (रिह्याबिलिटेसन), आयुर्वेदिक, प्राकृतिक चिकित्सा केन्द्र स्पार्क हेल्थ होम नेपालमा विभिन्न जिल्लाबाट आएर उपचार गराइरहेका (शारीरिक समस्यामा परेका) महिला तथा पुरूषहरूलाई उक्त ह्विल चियर हस्तान्तरण गरेको हो ।
उक्त सहयोग वितरण कार्यक्रममा रोटरी क्लब अफ त्रिपुरेश्वरकी अध्यक्ष लता बराल शर्माले क्लबले यसअघि पनि यस्तै सहयोगकै क्रममा २० ओटा ह्विल चियर वितरण गरेको जानकारी दिइन् । हस्तान्तरण पछि छोटो भनाइ राख्दै बरालले आफै हिड्न नसक्ने अशक्तहरूलाई यो ह्विलचियर प्रदान गरिएको र यसले वहाँहरूको अनुहारमा खुसी ल्याउन पाउँदा आफूलाई पनि ज्यादै खुसि मिलेको बताइन् ।
कार्यक्रममा बोल्दै रोटरीकी डिस्ट्रिक्ट फर्स्ट लेडी सरोजनी शेरचनले रोटरी क्लब अफ त्रिपुरेश्वरले गरेको सामाजिक कार्य उत्कृष्ट काम भएको भन्दै प्रशंसा गरिन्। क्लबका पूर्व डिस्ट्रिक्ट गभर्नर राजिव पोख्रेलले कार्यक्रमको प्रशंसा गर्दै क्लबको तर्फबाट यसअघि देशैभरि १ हजार बढि ह्विल चियर वितरण भइसकेको बताए । उनले थप सहयोग आवश्यक भए त्यसको लागि सहजिकरण गर्ने र त्यसकालागि अमेरिकी सहयोगी संस्था लेटर डे सेन्ट बाट सहयोग लिन सकिने समेत जानकारी दिए ।
उक्त कार्यक्रममा रोटरी क्लव अफ तीनकुनेका चार्टर्ड प्रेसिडेन्ट तिलक तिवारी, रोटरी क्लव अफ त्रिपुरेश्वरका पूर्व अध्यक्षहरू रमेश शर्मा,पञ्चकुमारी मानन्धर, राजेन्द्र शाक्य र राधा कुँवर लगायत क्लबका अन्य सदस्यहरूको उपस्थिति रहेको थियो ।
