काठमाडौं । सानिमा म्युचुअल फण्डअन्तर्गत सञ्चालित सानिमा इक्वीटी फण्ड, सानिमा लार्ज क्याप फण्ड र सानिमा ग्रोथ फण्डले भदौ मसान्तको खुद सम्पत्ति मूल्य विवरण सार्वजनिक गरेका छन् । उक्त वित्तीय विवरण अनुसार यी तीनओटै फण्डको नोक्सानी साउनको तुलनामा भदौमा वृद्धि भएको छ । 

सानिमा ग्रोथ फण्डले साउन मसान्तसम्ममा रू. ८० लाख ७७ हजार नोक्सानी व्यहोरेकोमा भदौ मसान्तमा बढेर रू. १ करोड १२ लाख पुगेको छ । त्यस्तै सानिमा लार्ज क्याप फण्ड साउन मसान्तसम्ममा रू. २ करोड ९७ लाख नोक्सानीमा रहेकोमा भदौ मसान्तमा बढेर रू. ४ करोड ५६ लाख पुगेको हो ।

सानिमा इक्वीटी फण्ड साउन मसान्तसम्ममा रू. २ करोड ९३ लाख नोक्सानीमा रहेकोमा भदौ मसान्तमा बढेर रू. ४ करोड ८२ लाख पुगेको छ । भदौमा यी फण्डको खर्चमा वृद्धि  भएको छ भने जम्मा आम्दानी ऋणात्मक रहेकाले नोक्सानी बढेको हो । 

सानिमा इक्वीटी फण्डको न्याभ साउन मसान्तको तुलनामा भदौमा घटेको छ । यस फण्डको न्याभ साउन मसान्तमा १२ रुपैयाँ ८६ पैसा रहेकोमा भदौ मसान्तमा घटेर १२ रुपैयाँ ७२ पैसामा झरेको हो । यस फण्डले भदौ मसान्तसम्ममा सूचीकृत धितोपत्रमा रू. १ अर्बभन्दा बढी लगानी गरेको छ । 

त्यस्तै सानिमा लार्ज क्याप फण्डले भदौ मसान्तसम्ममा सूचीकृत धितोपत्रमा रू. ७४ करोड ४५ लाख लगानी गरेको छ । यो लगानी साउन मसान्तमा भने रू. ७८ करोड ८८ लाख थियो । यस आधारमा फण्डले सूचीकृत धितोपत्रमा लगानी केही घटाएको छ । यस फण्डको न्याभ साउन मसान्तमा ९ रुपैयाँ ५३ पैसा रहेकोमा भदौ मसान्तमा घटेर ९ रुपैयाँ ४० पैसामा सीमित भएको छ । 

सानिमा ग्रोथ फण्डको न्याभ साउन मसान्तमा १० रुपैयाँ १५ पैसा रहेकोमा भदौ मसान्तमा १० रुपैयाँ १० पैसामा कायम भएको छ । त्यस्तै यस फण्डले भदौ मसान्तसम्ममा सूचीकृत धितोपत्रमा रू. ३३ करोड ६१ लाख लगानी गरेको छ । यो लगानी साउन मसान्तमा भने रू. ३२ करोड ७८ लाख थियो । 

सानिमा ग्रोथ फण्डको रिपोर्ट हेर्न यहाँ क्लिक गर्नुहोस ्

सानिमा इक्वीटी फण्डको रिपोर्ट हेर्न यहाँ क्लिक गर्नुहोस ्

सानिमा लार्ज क्याप फण्डको रिपोर्ट हेर्न यहाँ क्लिक गर्नुहोस ्