काठमाडौं । सिटिजन्स क्यापिटल लिमिटेडले असार १३ गतेबाट नयाँ योजना सञ्चालनका लागि इकाई निष्कासन गरेको छ ।

क्यापिटलकै व्यवस्थापनमा सञ्चालन हुने सिटिजन्स सदाबहार योजनाको इकाई सार्वजनिक निष्कासनमा ल्याइएको हो । ५० करोड रुपैयाँको आकार रहेको खुलामुखी प्रकृतिको यस योजना सञ्चालनका लागि योजना व्यवस्थापकले ५ करोड इकाई जारी गरेको हो ।

प्रतिइकाई १० रुपैयाँ अंकित मूल्यका ५ करोड इकाईमध्ये बीज पूँजीबापत न्यूनतम ७५ लाख इकाई वा कुल विक्री भएको इकाई संख्याको न्यूनतम १५ प्रतिशत इकाई कोष प्रवर्द्धक सिटिजन्स बैंक इन्टरनेशनललाई सुरक्षित राखिएको छ । यीबाहेक बाँकी न्यूनतम ४ करोड २५ लाख इकाई प्रथम चरणको निष्कासनमा ल्याइएको हो । सार्वजनिक निष्कासनमा आएको योजनाको इकाई खरीदका लागि असार १७ गतेसम्म आवेदन दिन सकिनेछ । उक्त अवधिसम्म मागबमोजिम आवेदन नपरेमा भने असार २७ गतेसम्म निष्कासन गरिने जानकारी क्यापिटलले दिएको छ ।

योजनाको इकई निष्कासन तथा विक्री प्रबन्धकमा सिटिजन्स क्यापिटल लिमिटेड रहेको छ । यी इकाई खरीदका लागि विक्री प्रबन्धकसँगै आस्बा सेवामा सहभागी सम्पूर्ण बैंक तथा वित्तीय संस्था र तिनका तोकिएका कार्यालयमार्फत आवेदन दिन सकिनेछ । साथै मेरो शेयर अनलाइनसमेत आवेदनका लागि खुला रहनेछ । न्यूनतम १०० इकाईदेखि अधिकतम ५० लाख इकाईसम्म आवेदन दिन पाउने व्यवस्था गरिएको छ ।