राजदूतको सिफारिशमा नेपाल सरकारले मात्र एकतर्फी तलब वृद्धि गर्दा वैदैशिक रोजगारीमा जाने कामदार तथा व्यवसायी दुवै मर्कामा पर्ने नेपाल वैदेशिक रोजगार व्यवसायी संघका महासचिव कमल तामाङले बताएका छन् । उनले भने, ‘सरकारले सम्बन्धित देशको सरकार तथा रोजगारदातासँग समन्वय नगरी साउदीको रोजगारीमा जाने कामदारको तलब निर्धारण गरेको छ, आफूखुशी तलब निर्धारण गर्दा हाल नेपाली कामदारले पाइरहेको साउदीको रोजगारी गुम्ने खतरा बढेको छ ।’

वैदेशिक रोजगारीमा जाने कामदारको तलब निर्धारण गर्दा सम्बन्धित देशको सरकारसँग समन्वय गर्नुपर्ने तामाङको भनाइ छ । ‘नेपाल वैदैशिक रोजगार व्यवसायी संघले पनि रोजगारीमा जाने कामदारको तलब बढाउनुपर्ने आवाज उठाउँदै आएको छ,’ उनले भने, ‘तर, सम्बन्धित देशको सरकारसँग समन्वय नगरी नेपाल सरकारले मात्र तलब वृद्धि गर्दा उनीहरूले नेपाली कामदार नलैजाने अवस्था आउन सक्छ ।’ पछिल्लो समय साउदीबाट फ्री भिसा, फ्री टिकटका कामदारको मागमात्र आइरहेको छ । नेपाल सरकारले साउदी सरकारसँग समन्वय नगरी एकलौटी रूपमा तलब वृद्धि गरेर वैदैशिक रोजगारी नै धरापमा पार्ने काम गरेको व्यवसायीहरूको आरोप छ । पछिल्लो समय संयुक्त अरब इमिरेट्स (यूएई) का लागि नेपाली राजदूतले पनि नेपाली कामदारको तलब बढाउन नेपाल सरकारलाई पत्राचार गरेका छन् । सरकारले यूएईका लागि तलब बढाउने हो भने नेपालीका लागि वैदेशिक रोजगारीको ठूलो अवसर गुम्ने तामाङले बताए ।

वर्ष ६, अंक २३६, बिहीवार, २८ वैशाख, २०६९