पुस २, काठमाडौं (अस) । अर्थ मन्त्रालयमा बसेको उच्चस्तरीय वित्तीय व्यवस्थापन समितिको बैठकले वित्तीय क्षेत्र विकास रणनीति तयार गर्न कार्यदल बनाउने निर्णय गरेको छ । उक्त कार्यदललाई रणनीतिको मस्यौदा तयार गर्न चैत मसान्तसम्मको अवधि तोकिएको मन्त्रालयले जानकारी दिएको छ । सो काम गर्न अर्थमन्त्रीको अध्यक्षतामा केन्द्रमा उच्चस्तरीय निर्देशक समिति र त्यसअन्तर्गत छुट्टाछुट्टै प्राविधिक र उपसमितिहरू गठन भएका छन् ।

यो कार्यदलले देशभरि सेमिनार, अध्ययन र छलफल गरी वित्तीय विकासको रणनीति तयार पार्नेछ । कार्यदलको प्राविधिक समितिमा राष्ट्र बैङ्कका वरिष्ठ गभर्नर अध्यक्ष, डेपुटी गभर्नर, अर्थ मन्त्रालयका सहसचिव र बीमा तथा धितोपत्र बोर्डका अध्यक्ष सदस्यका साथै राष्ट्र बैङ्कका निर्देशक सदस्यसचिव रहने व्यवस्था गरिएको छ । सो अवसरमा बोल्दै अर्थमन्त्री शङ्करप्रसाद कोइरालाले नयाँ बन्ने रणनीति वित्तीय संस्था, पूँजीबजार र बीमा व्यवस्थापनका लागि कोसेढुङ्गा सावित हुने विश्वास व्यक्त गरे । यसले मुलुकमा वित्तीय सन्तुलन कायम गर्न आउँदो १० वर्षसम्मका लागि निर्देशित गर्ने भन्दै कोइरालाले यस किसिमको काम इतिहासमै पहिलोपल्ट गर्न लागिएको बताए । आगामी वर्षको बजेट तयार गर्न यसबाट ठूलो मद्दत पुग्ने विश्वास व्यक्त गर्दै उनले बजेटमा तोकिएका काम सक्रिय रूपमा अघि बढाउन सरोकारवालाहरूलाई आग्रह गरे ।

२०७०/७१ को बजेटमा उल्लेख भएअनुसार वित्तीय क्षेत्रको विकासमा सहयोग पुर्‍याउन कार्यदल बनाइएको हो । बजेट भाषणको वित्तीय क्षेत्र सुदृढीकरणको एजेण्डामा भनिएको छ, ‘वित्तीय स्थायित्व कायम गर्ने, वित्तीय पहुँच बढाउने र वित्तीय क्षेत्रको विकास एवम् विस्तारबाट द्रुत गतिमा आर्थिक वृद्धि हासिल गर्न सघाउ पुर्‍याउन र बैङ्क वित्तीय संस्थाहरूको गुणात्मक विकास एवम् पूँजीबजार तथा बीमाक्षेत्रको समग्र पक्षलाई सुदृढ बनाउन वित्तीय क्षेत्र विकास रणनीति तयार गरिनेछ ।’