काठमाडौं । सिटिजन्स बैंक इन्टरनेशनलमा रहेको एफवान सफ्ट कम्पनीको खाताबाट रकम चोरी गर्न ५०० भन्दा बढी बैंक तथा वालेट खाता प्रयोग भएको भेटिएको छ । प्रहरीले १ महीना लगाएर गरेको अनुसन्धानबाट अन्तरराष्ट्रिय ह्याकरले सिस्टम ह्याक गरी रकम चोर्न विभिन्न व्यक्तिका बैंक तथा मोबाइल वालेट खाताहरू प्रयोग गरेको पाइएको छ ।
कम्पनीको खाताबाट ह्याकरले ३ करोड ४२ लाख रुपैयाँ चोरी गरेका थिए । चोरी भएको रकम ट्रान्सफर गर्न ५०० भन्दा बढी खाता प्रयोग भएको छ । त्यसमध्ये बैंकबाट चोरी भएको रकम पहिलो तहमा ट्रान्सफर भएका २४ जनाविरुद्ध भने शुक्रवार जिल्ला अदालत काठमाडौंमा विद्युतीय ठगीको मुद्दा दायर भएको छ । घटनाको अनुसन्धान गरेको नेपाल प्रहरीको साइबर ब्युरोका एसपी तथा प्रवक्ता दीपकराज अवस्थीका अनुसार विदेशबाट ह्याकरले सिस्टममै प्रवेश गरेर रकम चोरेको भेटिएको छ । प्रहरीको अनुसन्धान ह्याकरसम्म नपुगी चोरी गरिएको रकम पहिलो तहमा ट्रान्सफर भएका खाताधनीलाई मात्र प्रतिवादी बनाएर मुद्दा दायर गरिएको छ । प्रहरी अनुसन्धानका आधारमा जिल्ला सहकारी वकिलले २४ जनालाई प्रतिवादी बनाएकोमा १५ जना फरार छन् ।
पक्राउ पर्नेमा ललितपुरका ४० वर्षीय त्रिगुणरत्न वज्राचार्य, सिरहाका २० वर्षीय राहुल ठाकुर, १९ वर्षीय पुरुषोत्तम साह, सप्तरीका २१ वर्षीय कृष्णरमण राउत, ३१ वर्षीय सञ्जीवकुमार शर्मा र उदयपुरका कमल थापा मगर छन् । त्यस्तै, उदयपुरकै दीपक थापा मगर, सुनसरीका २४ वर्षीय सन्देश राई र सुनसरीकै सागरकुमार साहलाई प्रतिवादी बनाइएको हो । उनीहरूमध्ये अधिकांश १८ देखि २४ वर्ष उमेरसमूहका युवा छन् । प्रहरीसँगको बयानमा प्रतिवादीहरूले पैसा र जागीरको प्रलोभनमा बैंक खाता खोलेर प्रयोग गर्न दिएको बताएका छन् । ह्याकरहरूले घरमै बसेर पैसा कमाउने भन्दै अनलाइन जब अफर गर्ने र खाता खोल्न लगाएर कारोबारको आधारमा कमिशन दिने प्रलोभन बाँड्ने गरेको उनीहरूले बताएका छन् ।
गत महीनामात्र वित्तीय जानकारी एकाइमा वित्तीय अपराधमा साइबर ठगीको अंश बढ्दै गएको र साइबरमार्फत ठगी गर्ने व्यक्तिहरूले उपहार चिट्ठा परेको, पार्सल आएको जस्ता बहाना देखाउने गरेका प्रतिवेदन सार्वजनिक भएको थियो । नक्कली सामाजिक सञ्जालको खाता र अनलाइन प्लेटफर्म प्रयोग गरी ठगी भएको छ । कारोबारको वान टाइम पासवर्ड (ओटीपी) तथा विभिन्न डिजिटल प्रविधि प्रयोग गरेर सर्वसाधारणको बैंक खातामा पहुँच पुर्याई ठगी गरेको पाइएको प्रतिवेदनमा उल्लेख छ ।
यसैगरी प्रतिवेदनले साइबर ठगीमा सबैभन्दा बढी युवाको संलग्नता भएको र यस्तो अपराधका लागि अधिकांश नयाँ बैंक खाताको दुरुपयोग भएको औंल्याउदै नयाँ खाता खोलेर गरिने अपराध रोक्न खातामा कुलिङ पिरियड तोक्न, निश्चित अवधिका लागि कारोबारमा सीमा लगाउन र डिजिटल बैंकिङ सेवाका लागि प्रयोग हुने मोबाइल नम्बर ग्राहक वा तिनको परिवारका सदस्यको नाममा दर्ता भएको सुनिश्चित गर्नसमेत सुझाव दिएको छ ।
