काठमाडौं । प्रतिनिधिसभाअन्तर्गतको अन्तरराष्ट्रिय सम्बन्ध र पर्यटन समितिले नेपालको समग्र हवाई सुरक्षा मापदण्ड कार्यान्वयनको अवस्थाबारे छानबिन गर्न विज्ञहरू सम्मिलित एक स्वतन्त्र छानबिन समिति गठन गर्न सरकारलाई निर्देशन दिएको छ ।
समितिको आज सिंहदरबारमा बसेको बैठकले हवाई सुरक्षा मापदण्ड कार्यान्वयन भए÷नभएको अवस्थाबारे १५ दिनभित्र छानबिन गरी आवश्यक नीतिगत सुधार गर्न र कोही दोषी देखिएमा कारबाहीको सिफारिसका लागि विज्ञहरूको स्वतन्त्र छानबिन समिति गठन गर्न संस्कृति, पर्यटन तथा नागरिक उड्डयन मन्त्रालयलाई निर्देशन दिएको हो ।
पछिल्लो समय निरन्तर भइरहेको हवाई दुर्घटनाका सम्बन्धमा दुर्घटनापिच्छे छानबिन समिति बन्ने गरे पनि समग्र हवाई सुरक्षाको अवस्थामा सुधार आउनुको सट्टा झन् कमजोर बन्दै गएको निष्कर्ष निकाल्दै हवाई सुरक्षा मापदण्ड कार्यान्वयनको अवस्था तथा नेपालको विद्यमान नागरिक उड्डयनसम्बन्धी कानुन एवं अन्तरराष्ट्रिय अभ्यासअनुरुप कार्यान्वयनको अवस्थाबारे छानबिन गर्न निर्देशन दिइएको समितिका सभापति राजकिशोर यादवले बताए ।
उनका अनुसार बैठकमा एयर डाइनेस्टीको हेलिकप्टर दुर्घटना सम्बन्धमा पर्यटनमन्त्री, सचिव र नेपाल नागरिक उड्डयन प्राधिकरणका महानिर्देशकसँग छलफल गरी समितिले उक्त निर्णय गरेको हो ।
समितिले उड्डयन प्राधिकरणसम्बन्धी कानुनलाई संशोधन र एकीकरण गर्न बनेको विधेयक, नेपाल हवाई सेवा प्राधिकरणको स्थापना र व्यवस्था गर्न बनेको विधेयक यथाशीघ्र सङ्घीय संसद्मा पेस गर्न पनि प्रधानमन्त्री तथा मन्त्रिपरिषद्को कार्यालय तथा पर्यटन मन्त्रालयलाई निर्देशन दिने निर्णय गरेको छ ।
यसअघि हवाई दुर्घटना, सुरक्षा र नियमनसँग सम्बन्धित नेपाल सरकार र मन्त्रालयद्वारा गठित छानबिन समिति एवं कार्यदलमार्फत पेस भएका अध्ययन अनुसन्धानमूलक प्रतिवेदनहरू के र कुन अवस्थामा छन्, सोको जानकारी सहितको विवरण समितिलाई यथाशीघ्र उपलब्ध गराउन पनि समितिले पर्यटन मन्त्रालयलाई निर्देशन दिएको छ ।
यस्तै, नेपालमा हवाई नीति, २०६३ सालदेखि कार्यान्वयनमा आए पनि मुलुकको हवाई उडान सुरक्षासम्बन्धी छुट्टै नीति आवश्यक देखिएकाले उक्त नीति तर्जुमा गर्न प्रधानमन्त्री तथा मन्त्रिपरिषद्को कार्यालय र पर्यटन मन्त्रालयलाई निर्देशन दिइएको छ । बैठकले प्रधानमन्त्री तथा मन्त्रिपरिषद्को कार्यालय र पर्यटन मन्त्रालयलाई दिएका निर्देशनहरू हालसम्म पनि कार्यान्वयन भएको नदेखिएकाले ती निर्देशन कार्यान्वयनका लागि पुनः स्मरण गराएको छ ।
समितिका सभापति यादवले दुई सातामा दुई हवाई दुर्घटनाले हवाई सुरक्षामात्रै नभई मुलुकको छविमा समेत आँच आउने खतरा बढेको भन्दै आगामी दिनमा यस किसिमको दुर्घटना न्यूनीकरणको उपाय खोज्न र जिम्मेवार निकायका पदाधिकारीलाई कानुनी दायरामा ल्याउन माग गरे ।
बैठकमा बोल्ने अधिकांश सांसदहरूले पटक–पटक हवाई दुर्घटनापछि छानबिन समिति बन्ने र प्रतिवेदन कार्यान्वयन नहुने प्रवृत्ति रहेको भन्दै सरकारको ध्यानाकर्षण गराएका छन् । साथै उनीहरूले पछिल्ला दिनमा भइरहेको निरन्तर हवाई दुर्घटनामा नियमनकारी निकायको लापरबाही रहेको भन्दै जिम्मेवार पदाधिकारीलाई कानुनी दायरामा ल्याउन माग गरे ।
आजको बैठकमा सांसदहरू विमलेन्द्र निधि, एनपी साउद, उदय शम्शेर जबरा, राजेन्द्र बजगाई, भीमप्रसाद आचार्य, देवीप्रकाश भट्टचन, शिशिर खनाल, डा. धवलशम्शेर जबरा, प्रभु साह, सुनिता बराल, हितबहादुर तामाङ र छिरिङल्हामु लामाले आफ्ना धारणा राखेका थिए । रासस
.jpg)
