काठमाडौं । सानिमा बैंक कोष प्रवर्द्धक तथा सानिमा क्यापिटल लिमिटेड योजना व्यवस्थापक रहेको सानिमा ईक्विटी फण्ड परिपक्व भएसँगै खारेजी प्रक्रियामा रहेको छ । गत पुस १० गतेदेखि परिपक्व भएको यस योजनाले आफ्नो स्वामित्वमा रहेका तीन कम्पनीको शेयर लिलामी प्रक्रियाबाट विक्री गर्न सूचना जारी गरेको छ ।

कम्पनीले फागुन ६ गतेदेखि १२ गतेसम्म आवेदन दिन सकिने गरी शिवम् सिमेन्टको ४ हजार ६३ कित्ता, लाईफ इन्स्योरेन्स कर्पोरेशनको १ कित्ता र एनएलजी इन्स्योरेन्सको ३ कित्ता शेयर लिलामीमा ल्याएको हो । यी शेयर सम्बन्धित कम्पनीद्वारा घोषित बोनस तथा हकप्रद शेयर रहेको जानकारी योजना व्यवस्थापक सानिमा क्यापिटल लिमिटेडले दिएको छ ।

शिवम् सिमेन्टको शेयर प्रतिकित्ता ४८१ रुपैयाँ, लाईफ इन्स्योरेन्स कर्पोरेशनको शेयरको मूल्य प्रतिकित्ता ९४८ रुपैयाँ र एनएलजी इन्स्योरेन्सको प्रतिकित्ता ८०५ रुपैयाँ तोकेर विक्रीमा आएको हो । तोकिएको मूल्य वा सोभन्दा बढी मूल्य अंकित गरी यी शेयर खरीदका लागि आवेदन दिन सकिनेछ । यी शेयर विक्री प्रबन्धकमा सानिमा क्यापिटल लिमिटेड रहेको छ । यी शेयर बाँडफाँटमा प्राप्त गर्ने लगानीकर्ताको नाममा दोस्रो बजारमा सूचीकृतपछि मात्र नामसारी हुने जानकारी योजना व्यवस्थापकले दिएको छ । 

सात वर्षे अवधिको बन्दमुखी प्रकृतिको यस योजनाको १३ करोड इकाई दोस्रो बजारमा सूचीकृत रहेको थियो । योजना परिपक्व भएसँगै खारेजी प्रक्रियामा जाने भएकाले सूचीकरण समेत खारेज भैसकेको छ । यस योजना सञ्चालनका लागि प्रति इकाई १० रुपैयाँ अंकित मूल्यमा १३ करोड इकाई विक्री गरिएको थियो ।

नेपाल धितोपत्र बोर्डले यस योजना सञ्चालनका लागि योजना व्यवस्थापकलाई २०७४ साल कात्तिक २७ गते अनुमति दिएको थियो । २०७४ पुस ११ गते योजना सञ्चालनका लागि विक्री गरिएको इकाई बाँडफाँट गरिएको थियो ।

कात्तिक मसान्तसम्मको वित्तीय विवरण सार्वजनिक गर्न बाँकी रहेको यस योजनाको असोज मसान्तसम्म १ अर्ब ५४ करोड रुपैयाँभन्दा बढी खुद सम्पत्ति रहेको छ । यस अवधिसम्म योजनाको प्रति इकाई खुद मूल्य ११ रुपैयाँ ८५ पैसा छ । असोज मसान्तसम्म योजना २३ करोड ४२ लाख रुपैयाँभन्दा बढी नाफामा रहेको देखिन्छ ।