काठमाडौं । लाइफ इन्स्योरेन्स कर्पोरेसन (नेपाल) लिमिटेडले नयाँ बोनस दर सार्वजनिक गरेको छ । कम्पनीले नेपाल बीमा प्राधिकरणको चैत १७ गतेको स्वीकृति पत्रका आधारमा गत आर्थिक वर्ष ०८०/८१ को बीमाङ्कीय प्रतिवेदन अनुसार मुनाफामा सरिक हुने गरी नयाँ बोनस दर निर्धारण गरेको हो । 

कम्पनीले अधिकतम ६५ रुपैयाँसम्म बोनस दर वितरण गर्ने जानकारी दिएको छ । कम्पनीले जारी गरेका विभिन्न बीमालेख मध्ये सावधिक (३३३) बीमालेखमा ३५ देखि ४४ वर्ष अवधिका लागि जारी भएमा अधिकतम ६५ रुपैयाँ बोनस वितरण गर्ने बताएको हो । यसै बीमालेखमा अवधिका आधारमा सबैभन्दा कम बोनस दर ५५ रुपैयाँ रहेको छ ।

कम्पनीले तय गरेको नयाँ बोनस दरलाई हेर्दा न्यूनतम ४१ रुपैयाँसम्मको बोनस दर तय गरिएको छ । न्यूनतम ४१ रुपैयाँ बोनस दर भने लघु सावधिक (३५४) का सबै बीमालेखमा र जीवन बचत (३५९) बीमालेख अन्तर्गत ५ देखि ९ वर्ष अवधिको बीमालेखमा वितरण गर्ने जानकारी कम्पनीले दिएको छ । यो बाहेक अन्य बीमालेखमा कम्पनीले सोभन्दा माथीकै बोनस दर कायम गरेको छ । कम्पनीले कायम गरेको नयाँ बोनस दर नेपाल बीमा प्राधिकरणबाट अर्को व्यवस्था नभएसम्मका लागि लागू हुनेछ ।