काठमाडौं । मिथिला लघुवित्त वित्तीय संस्था लिमिटेडले १४औंवार्षिक साधारण सभा बुधवार आयोजना गरेको छ ।
सभा न्यू बौवा होटल एण्ड गेष्ट हाउसको सभाहल भिथिला नगरपालिका-१० लालगढ, धनुषामा बिहान ११ बजे शुरू हुने कम्पनीले जानकारी दिएको छ । सभाले १५ प्रतिशत बोनस शेयर र कर प्रयोजनको लागि शून्य दशमलव ७८ प्रतिशत नगद लाभांश वितरण गर्ने प्रस्ताव पनि पारित गर्नेछ ।
कम्पनीले हाल कायम रहेको अधिकृत पूँजी रू. २० करोडमा रू. १० करोड थप गरी रू. ३० करोड पुर्याउने प्रस्तावलाई समेत सभाले पारित गर्नेछ । सञ्चालक समितिको अध्यक्ष र सञ्चालकहरूको बैठक भत्ता वद्धि गर्ने प्रस्ताव पनि सभाका लागि तय भएको छ ।
हाल कम्पनीमा ६० प्रतिशत संस्थापकतर्फ र ४० प्रतिशत सर्वसाधारणतर्फ शेयर स्वामित्व रहेको छ । सो संरचना परिवर्तन गरी संस्थापकतर्फ ५१ प्रतिशत र सर्वसाधारणतर्फ ४९ प्रतिशत कायम गर्ने प्रस्ताव पनि सभाले पारित गर्नेछ ।
उल्लिखित प्रस्तावसँगै अन्य कुनै लघवित्त वित्तीय संस्थासँग मर्जर तथा प्राप्ति प्रक्रियामा जान आवश्यक भएमा त्यसको सम्पूर्ण जिम्मेवारी सञ्चालक समितिलाई दिने निर्णय पनि सभाले गर्नेछ ।
साधारण सभा प्रयोजनका लागि कम्पनीले फागुन ५ गते एक सदिन बुक क्लोज गरेको थियो । बुक क्लोजको आधारमा फागुन ४ गतेसम्म कायम शेयरधनीहरू मात्र सभामा भाग लिन र लाभांश प्राप्त गर्न योग्य छन् ।
